Djis Pa Hari, e grupo di creativonan cu ta consisti di Ephrayim Odor (co-fundado), Semi Chahmi (Co-fundado), Beach Lama (Productor Ehecutivo) y Samir Angel (Actor) lo ta formando parti di un proyecto bao di Erasmus+ cu diferente otro organisacionnan den region di Caribe y Europa. E grupo, miho conoci pa diferente tipo di produccion y video comico durante ultimo aña riba plataformanan social, awor ta enfocando den sigui expande nan mes, nan idea- y metanan.
Via di Stichting Djis Pa Hari Media Verse, miembronan Semi Chahmi cu Beach Lama a biaha bay Alemania e fin di siman cu a pasa pa asina reuni algun dia hunto cu organisacionnan manera e.o. Elisa Academy di Corsou, Lichause di Alemania, Gyonne Goedhoop y varios otro representantenan den areanan di sector social, artistico y mas. Miembronan Ephrayim Odor y Semi Chahmi ya caba a topa cu nan na Corsou algun tempo atras den e prome fase di e proyecto aki.
E meta ta pa den e siguiente dianan reuni na Alemania y cuminsa finalisa otro detayenan cu ta haci falta pa asina prepara un programa cu lo bay ta presenta na varios di nos islanan den Caribe y tambe algun luga na Europa. Pronto lo tin mas informacion riba kico asina e programa aki lo encera. Por bisa si cu e proyecto ta uno dirigi na educacion di nos hobennan den locual ta cultura y historia, e conexion entre Europa y Caribe, su logronan y desafionan.
