Durante un conferencia di prensa Prome Minister mr. Evelyn Wever Croes a papia riba e decision tuma pa cuminsa suavisa e medidanan impone algun luna atras den cuadro di COVID-19.
E situacion di COVID na Aruba ta bayendo den bon caminda, danki na e forma con cada ciudadano ta cuidando nan mes, e mandatario a bisa. “Nos ta mirando e luz na final di caminda, y ta drenta un etapa nobo. Cu e cifranan cu nos tin awor, cu 96 caso activo, casonan activo bahando bou di 100, mirando e situacion na hospital cu 9 persona interna, ta bon indicador. Pero tambe cu tin 56% di poblacion ta vacuna, ta dunando hopi speransa.
E grupo di 60+ tambe ta avansando basta bon, e mandatario a bisa. Gobierno ta haci esfuerso grandi pa logra yega na 85% di e poblacion vacuna.
E situacion aki di casonan activo, situacion controla na hospital, vacunacion bayendo bon, ta pone cu Crisis Team a yega na e conclusion cu ta momento pa flexibilisa e medidanan. Aruba ta drentando den codigo geel.
TDQ ta bira 12’or, mey anochi y caba pa 4.30 di mainta. Orario di ciere ta bira 11’or om. Samenscholing d mas cu 2 hende hunto riba caminda, ta wordo elimina. Pero ta pidi pa sigui uza tapaboca. Gebiedsverbod si ta keda existi, no por ta riba luganan publico despues di 7.30 di anochi.
Na restaurantnan e cantidad di personanan na mesa paden ta 8 y pafo ta 10, pero sigui reglanan y no ta permiti bailamento. Encuentronan familiar ta permiti, cu un maximo di 30 persona paden, basta cu tin espacio, y pafo te 60 persona ta permiti. Bishita na cas ta bira posibel, pero ta pidi pa controla cada doño di cas.
Contact sport por tuma luga, pero bou di 18 aña. Ainda conseho ta paden sin eventonan deportivo sin publico y pafo 60 hende. Musico ta cinco persona riba scenario y mester percura pa no tin bailamento.
Entiero por tin maximo 60.
Actividadnan publico y politico, ta segun reglanan di Crisis Team. Ta conseha pa mantene distancia.
Si cifranan sigui baha, lo por sigui flexibilisa medidanan. Pero si cifranan subi, no avansa cu vacunacion y cantidad di hende interna subi, lo mester escala medidanan atrobe. Hopi a wordo sacrifica desde aña pasa, ban no tira loke a logra un banda, e mandatario a pidi.