Dialuna dia 21 di November proximo, Erasmus Consulting & Training ta organiza un lectura / tayer interactivo riba e topico di emprendimiento social of miho conoci como Social Entrepreneurship.
E lectura aki ta completamente gratis y e cupo ta limita.
E tayer lo tuma luga na oficina y training facility di Erasmus Consulting & Training situa na Newtonstraat 1-A, Oranjestad. E tayer lo ta di 7:00PM – 9:00PM y na final lo tin oportunidad pa haci pregunta.
Personanan interesa pa asisti na e tayer mester registra online via e pagina di Facebook, ectaruba, of via website: www.ectaruba.com. Of por usa un smartphone y scan e QR code den e relato aki pa registra. Tene cuenta cu cupo ta limita y asina cu alcansa e maximo capacidad, no por acepta mas inscripcion.
E workshop lo wordo facilita door di Sr. Edward Erasmus, MA.
Emprendimiento social ta un modelo di haci negoshi relativamente nobo cu por contribui na resolve problema nan social y ambiental na un forma innovativo. Durante e tayer interactivo aki, participantenan lo sera conoci cu e significado y e concepto di emprendimiento social y tambe lo explora den ki forma un social enterprise por enfoca riba formula nan pa opera esaki den formato di un negoshi, mientras cu na mes momento por genera un impacto social. Na Aruba ja caba tin algún empresa cu ta aplica e concepto di emprendimiento social den forma exitoso, pero tin hopi mas oportunidad pa desaroya e forma di haci negoshi aki den diferente sector.
Tur hende por asisti, pero e tayer aki sigur ta relevante si bo ta un empresario, emprendedor social, organisacion social, of si bo ta maneha un empresa y kier contribui aun mas na e mehoracion di nos sociedad.
Erasmus Consulting & Training a wordo funda na aña 2001 cu meta pa brinda solucionnan na empresanan chikito y mediano pa yuda nan alcansa mas crecemento, y pa mehora nan productividad y logra mas exito. Atraves di workshops y cursonan cu e compania ta ofrece, ta haci un contribucion na mehora e conocemento di e mercado laboral di Aruba pa asina eleva calidad di servicio y produccion den nos comunidad.
Pa mas informacion di e tayer por tuma contacto via email: [email protected].