Sra. Bianca (Linda) Orman, den nomber di tur Taxi Central y tambe na number di Taxi Unie, a manda un carta pa Minister di Transporte, Sr. Chris Romero, pa su falta di etica y respet pa cu e taxistanan.
Den e carta nan ta expresa cu nan a bin tuma nota cu ta algun chauffeur di taxi so a wordo invita pa un reunion, cual lo tuma luga dia 20 di November proximo, for di 3 or di atardi te cu 5 or. Den e reunion lo presenta e maneho nobo. Pero niun Central di Taxi ni tampoco Taxi Unie no a ricibi un invitacion.
Esaki ta wordo considera un falta di respet cu Minister C. Romero ta bay informa riba su maneho nobo, lagando e mayoria afo di e reunion aki.
Minister C. Romero tin cu of cancela e reunion cu esunnan cu a ricibi e invitacion of invita Taxi centraalnan y Taxi Unie cu ta representa e mayoria di chauffeurnan di taxi. Motibo ta cu un maneho nobo ta pa tur 450 taxista sea cu ta afilia na Taxi centraal, firmante cerca Taxi Unie of un taxista individual.
Ta asumi cu si Taxi Centraalnan y Taxi Unie no ricibi un invitacion ta pa motibo cu e reunion di dia 20 di November a wordo cancela.