Shonnan, tin un dicho bieu den e “wandelgangen” di antaño aki na Aruba: “bo no por ranca pluma for di un morocoy”! Den fin di siman di Rey, riba diasabra 26 di april ultimo, e teamnan di domino Taxi Boys y Pluma Gang a enfrenta otro pa determina cua ekipo lo bay final dje tremendo torneo 4X4 aya n’e mundialmente famoso Domino Square Garden. Y ta aki, e anochi ey, cu e dicho bieu ey a bin na mente di varios presente. Pluma Gang DT por bien ta tin cu bay cambia nan nomber pa Morocoy Boys DT! N’e pito di salida, Taxi Boys a sali c’un ranca asina fuerte y rapido, cu tabata parce cu e integrantenan di Pluma Gang tabata moviendo den slow motion! Cierto conocido miembro di comunidad, si e tabata presente e anochi ey, lo a grita nan cu nan piedra ta slap!
“Fast & Furious” a keda kens compara cu Taxi Boys! Den un frega di wowo, prome cu e prome sloknan di cerbes por a haya chens di muha nan pik, ya Taxi Boys a yega halftime cu score impresionante di 11-4! Integrantenan di Pluma Gang a keda wak otro cu cara di “que paso aqui?”, style di yuwana cu nan a rosa su mondi! Domino Square Garden a keda ‘klink’ so cada biaha piedra bati duro “Bam-Bam-Bam” y Taxi Boys score otro punto mas, lagando e morocoynan wowo ta blink manera coneu den luz di auto. Despues di e tradicional pasapalonan por nada den halftime, e wega ta sigui y aki ta “lo mismito” ta sigui toca! Den un forma cu casi por bisa ta contra derechonan humano, e integrantenan di Taxi Boys ta “despluma” Pluma Gang por completo. Den tempo record e wega ta caba c’un score aplastante di 21-10 pa Taxi Boys!
Shonnan, keda pendiente1 E gran final lo bay ta entre Biba Lekker y Taxi Boys diasabra awor 3 di mei! Yegaaa
