Despues cu un tata a bin wak un caso di un pastoor cu a keda deteni na Pierdra Plat algun luna pasa, a dicidi di pone un comentario riba Facebook cu a awe a logra mas di 6000 firma di famianan rabia, indicando cu mucho no ta ser haci pa abuso di mucha na Aruba. Jairo Maduro ta conta kico ta e idea di e accion di firma aki ta.
El a splica cu tur cos a cuminsa ta wak noticia, y tambe unda cu el a lesa riba medionan social ora cu nan a gara un pastoor op heterdaad caminda a indign’e. Tur hende na Aruba sa cu e situacion ta hopi alarmante tocante di abuso di menor. Kico a pasa cu e caso aki tabata caminda cu el a wordo gara in fragante. Su punto di bista ta, cu ta esey mester a pasa pa algo wordo haci? Ta asina leu cos mester yega pa algo wordo haci. Ta un video cu el a lansa riba su pagina personal di Facebook sin spera cu e tabata tin un snowball effect asina grandi cu awendia ta recolectando firma. A pasa 6000 mil forma te asina leu, pero cada bes ta bin mas storia dilanti. Loke ta mas ta intriga Maduro ta cu no esunnan cu a sali den publicidad so. Tin hopi caso cu no a sali den publicidad y cu awor aki cu nan a wak cu Maduro ta un simpel tata cu a cuminsa cu un causa, ta busk’e pa scucha nan storia y puntra kico mester haci awo.
Nan ta buscando ayudo. Loke mester corda y loke cu Maduro tene presente ta cu ta sali tin biaha storianan cu ta bisa cu 10 aña pasa tal cos a pasa, 20 aña pasa tal cos a pasa y di biaha ta ripara e reaccion di personanan cu ta husganan pakico no a bin dilanti prome.
Nos ningun no por imagina e agonia, loke e personanan aki ta sufri. Nan ta biba cun’e durante hopi tempo y pakico nan no a bin dilanti pasobra nan no ta keriendo den e sistema hudicial, e sistema di ley. Nan no ta kere den dje pasobra nan ta ripara cu nada no ta wordo haci toch cu e abusadornan aki.