BOGOTA, Colombia – Un homber cu tabata busca pa Polis, despues di asesina su pareha un aña y ocho luna pasa, den e localidad di Kennedy, a wordo captura na Bogota den e ultimo oranan. Asina Noticias Caracol a sigura, cu ademas a revela cue tata di e victima, identifica como Diana Rondon, tabata esun cu a haya e agresor y a bisa autoridadnan unda e tabata.
E asesinato a tuma luga den e cas di Rondon. Algun luna prome, e muhe a presenta un denuncia na e comisaria di e famia di Kennedy. Cu esaki y otro pruebanan, Polis a descubri cu su amigo y tata di su yiu a asfixi’e. E curpa tambe a aparece cu mordi. Den e momentonan aki, e presunto victimario, Carlos Daniel Pinto, a huy.
Jesus Rondon, tata di Diana, a pone como su tarea pa busk’e y a haci un siguimento exhaustivo. “Mi a priminti mi yiu muhe cu mi lo haci lo ultimo pa gar’e. Tin biaha mi tabata trasnocha pa busk’e. MI tabata bin trabao yena cu soño, pero mi a logra,” e homber a bisa Noticias Caracol.
Ora cu polis a bay captur’e, e sospechoso a presenta papelnan falso. Sin embargo, polis ya tabata tin’e identifica. Carlos Daniel Pinto a wordo manda prizon pa un hues di garantia, despues di a acepta e cargonan. E homber mester responde pa feminicidio agrava y por paga entre 45 y 60 aña di prizon. Segun ministerio publico, a reporta 345 denuncia desde cu e feminicidio a keda tipifica como un delito. Na 2016, na Bogota 109 muhe a wordo asesina, siendo cu na Ciudad Bolivar, Kennedy y Suba, ta e localidadnan cu mayor cantidad di caso.
Fuente: www.elespectador.com