BAJA CALIFORNA SUR, Mexico – E curpa sin bida di e empresario Jose Arrendondo a wordo haya den su cas na Cabo San Lucas, Baja California Sur.
Autoridadnan di e ciudad di San Jose del Cabbo, den e estado Mexicano di Baja Californai Sur, ta investigando e morto di e comerciante Jose Arrendodo, di 58 aña, kende su curpa a wordo haya diamars, AP a señala.
For di Ministerio Publico di e estado a informa cu e curpa tabata tin “señalnan di un traumatimso cu’n “obheto skerpi”.
Un amigo di e famia a afirma na e cadenana KBAK y KBFX, cu ta pertenece na CBS y Fox58 respectivamente, cu e doño di e empresa Family Motors Auto Group, cu sede na Bakersfield, California (Merca) a fayece durante un robo den su cas na Cabo San Lucas. Mientras tanto, e pastor di e parokia di Arrendodo a informa na e portal Bakersfield.com cu e empresario a muri door di hinkanan ricibi.
Di otro banda, Departamento di Estado di Merca a confirma e morto di e ciudadano Mericano na Cabo San Lucas y a bisa cu “nan ta monitor e investigacion di e autoridadnan local”.
E fayecido ta tata di e cantante di K-pop Samuel, cual nomber berdadero ta Samuel Kim Arredondo, cu a nace na Merca pero aworaki ta bibando na Korea del Sur. Na comienso di su carera, e musico di 17 aña a protagonisa algun comercial di su tata. Despues e tabata integrante di e duo 1PUNCH y na 2017 el a haci su debut como solista.