DALLAS, Texas.-Segun e prome version, Sherin di 3 aña a disparce despues cu su tata a straf e mucha y bis’e pa e bay para pafo door cu e no kier e bebe su lechi.
Wesley Mathews, di 37 aña a duna su yiu muhe adoptivo ordo pa keda para banda di un mata, banda di 3 or di marduga. E homber a sali bay busca su yiu 15 minuut despues, pero ya e no tabata t’ey.
Autoridadnan a bisa cu e tata no a notifica polis di e desaparicion di su yiu sino te cu cinco hora despues.
Tata di e criatura di 3 aña a wordo deteni diamars y ta wordo acusa di daño grave na un menor, un delito castigabel te cu cadena perpetua y e caso a dal un buelta inespera despues di e declaracionnan di e tata adoptivo.
E tata di e mucha cu a wordo interoga diamars door di detectivenan y a termina dunando un version completamente otro di loke el a bisa inicialmente despues di e desaparicion di su yiu dia 7 di October.
El a adminti di cu e tabata dunando Sherin di come den e garashi di e cas, pero e mucha no tabata kier a obedece. El a declara cu despues di un rato, e mucha a dicidi di bebe su lechi y e tata a “yud’e fisicamente” mientras cu e tabata bebiendo su lechi.
Despues cu Sherin a bebe su lechi, segun Mathews su declaracion na polis, e mucha a cuminsa chok y hala rosea poco poco. E tata no tabata sinti Sherin su pols y el a kere cu e mucha a muri. Den e investigacion nan ta señala cu e tata di e mucha a admiti cu el a saca e curpa for di cas.
Mama di Sherin tabata na soño y no tabata sa di nada loke tabata pasando, segun informacionnan duna inicialmente na polis.
Medionan local a señala cu famia Mathews a adopta e mucha di un orfanato na India como dos aña pasa. E pareha tin un yiu biologico un aña mas grandi cu Sherin.
Mathews a declara na polis cu e mucha tabata fisicamente retrasa y desnutri ora cu e y su casa a adopt’e y a bisa cu nan mester a dun’e un dieet special cu tabata inclui dun’e di come cada biaha cu e ta lanta, aunke tabata anochi, pa e haya peso.
Fuente: https://www.debate.com.mx