Taskforce contra Traficacion y Contrabanda di Hende Aruba ta organisa tres dia di training y informacion riba e dianan 7, 8 y 9 di December 2016. Durante e training lo wordo splica kico ta traficacion di hende, kico ta e señalnan di traficacion di hende y kico por wordo haci pa stop e. Trainer lo ta Shamere McKenzie, cu tabata un victima di traficacion di hende den pasado. El a conoce su traficador momento cu el a busca un manera pa haya placa pa bay scol. E tabata un nice hende cu a splik’e cu e por a gana hopi placa door di baila den un club. Pero esey no tabata berdad y den e añanan siguiente el a fors’e pa traha como prostituta y bailarina exotico. Shamere a bisa no hopi biaha y a wordo maltrata severamente pavia di esey. Scapa no tabata posibel te cu polis a aresta su ‘boyfriend’ y e por a conta su storia. E ta un storia over un muher cu a scapa for di sclabitud moderno. U muhe cu ta usa su experiencianan pa informa otro over di e risiconan pa bira victima di traficacion di hende y con conocemento di e señalnan por preveni esey.
E training ta wordo organisa riba dia 7 y 8 di December 2016 pa empleadonan di airport, aerolineanan, hotel, transporte y otro organisacionan interesa. Den e trainingnan lo wordo informa over e señalnan di traficacion di hende, con pa reconoce nan y kico pa haci ora tin un sospecho cu tin traficacion di hende. Door di esey lo por crea un chens pa traficacion por wordo preveni tempran. E training lo ta den vergaderzaal di ATIA na Pedro Gallegostraat 6, di 9 pa 12 or y di 13.30 pa 16.30 or. Dia 9 di December 2016 tin dos sesion di informacion na Cas di Cultura. Di 9 pa 12 or tin un sesion pa studiantenan di MAVO, HAVO, VWO, EPI and EPB. Nan lo wordo informa over di e risiconan pa bira victima di traficacion di hende ora di bay studia afo, special den e forma di ‘Loverboys’. Di 13.30 pa 16.30 or lo tin un sesion pa publico general of empleadonan cu no por a bin e otro trainingnan. Entrada ta free, pero preferiblemente registra na [email protected]. Tur sesionan ta den Ingles.
E sesionnan a wordo realisa cu yudansa di: Aruba Airport Authority (AAA), Aruba Trade and Industry Association (ATIA), La Quinta Beach Resort, Refineria di Aruba, CEDE Aruba, Smith & Dorlas, Cuerpo Policial Aruba.