Diasabra 17 di September venidero di 5 or’ di atardi te 7’or di anochi Taoist Tai Chi Society Aruba ta celebra Awareness Day of Dia di Conscientisacion na Linear Park (dilanti Talk of The Town).
Ta tradicion cu tur aña paisnan rond mundo, miembro di International Taoist Tai Chi Society, ta celebra Awareness Day of Dia di Conscientisacion unda tur hende ta bonbini. Cu e celebracion aki e sociedad kier logra pa mas tanto hende posibel cera conoci cu e arte di Taoist Tai Chi™ y bira consciente di su beneficionan pa salud fisico y mental.
Un set di Taoist Tai Chi™ ta consisti di 108 movecion cu ta dirigi riba salud y relahacion. E ta yuda hende di tur edad mantene un bon estado di salud fisico y mental den nos mundo moderno unda ta mas y mas dificil pa hende maneha e stress cu nan ta experencia den nan bida diario, na cas, school y trabou y sinti un paz interno. E ta yuda personanan cu ta malo recobra nan salud y esnan cu malesa cronico mehora nan calidad di bida.
Artenan di Taoist Tai Chi™ ta wordo practica pa alrededor di 40.000 persona den 25 pais rond mundo y esnan cu ta practik’e cu dedicacion por testigua di e mehoracion profundo cu nan ta experencia den nan condicion fisico, mental y nan bienestar general. Riba e website www.taoist.org por wak hopi video di personanan cu ta conta nan storianan personal di e resultadonan di nan practica di Taoist Tai Chi™.
Diasabra 17 di September venidero cuminsando for di 5 or’ di atardi lo tin demostracion di e arte di Taoist Tai Chi™ na Linear Park. Publico en general ta invita pa bin presencia e demostracion aki y join un klas di introduccion gratis.
Adhunto un portret di e grupo di 9 persona cu a asisti na e celebracion di Awareness Day cu a tuma lugar na Toronto, Canada, dia 11 di Augustus ultimo.