WILLEMSTAD – E cantante Curasoleño Tamara Nivillac ta lansa un cantica dedica specialmente na mamanan rond mundo titula ‘Mama’. E videoclip di ‘Mama’ a keda produci pa talentoso Ryan “QD” Navarro, cual a keda graba durante Tamara su estadia cuminsamento di aña na Corsou. Riba dia di mama, Tamara lo bay tin un concierto di mama aya na Hulanda titula “A Mother’s Love”.
Despues di un temporada sin a lansa produccionnan propio, Tamara ta bek cu un cantica nobo riba mercado cu e mes a composita. Mama ta un palabra universal cu tin e mesun nificacion den casi tur lenga y esey ta haci’e ainda mas special y fuerte. E cantica ‘Mama’ ta dedica na prome luga su mes mama i alabes na mamanan rond mundo y tambe na esunnan cu no ta mama biologico pero cu si a tuma na nan encargo e rol importante y poderoso aki. Tamara ke expresa su gratitud pa tur e sacrificionan cu nos mamanan a haci, pa asina nos por ta e personanan cu nos ta awe den comunidad. Pa Tamara tur dia ta dia di mama y p’esey e no ta mira e cantica aki como un cantica exclusivo pa e celebracion, pero como un homenahe y gradicimento na mamanan henter aña.
Pa e parti di areglo musical, Tamara a colabora pa prome biaha cu e musico y productor Elbert Jozefa, cu no ta desconoci den e farandula local. Elbert a traha riba diferente produccion y hitnan di artistanan local manera entre otro Aemy NiaFeliz y tambe Heinrich ‘Richie Rich’ Pieters. Tambe e ta miembro y areglista di e grupo di Seu HPA, cu tur aña ta haci un aporte grandi na nos cultura den entre otro Kantadó Mayó. Tamara a colabora tambe rib’é cantica aki cu e talentoso cantante y rapper Sherman Smith. Sherman ta un hoben cu pa un tempo caba a bini ta haci furor cu su canticanan den e genero urbano na Corsou. Tamara ke gradici Arcas BV y Avila Beach Hotel pa nan aporte pa realisacion di e proyecto aki y tambe na e tremendo visagista Diantha Rodrigues Pereira di Didicakes y Brauhaus pa su toke final.
E cantica ‘Mama’ ta ki den e genero di ‘World Music’, cu ya pa algun tempo caba Tamara a bini ta experimentando cun’e y e ta den su lenga materno, Papiamento. Tamara mes ta referi na e su musica como ‘Caribbean Soul’. Den cuadro di lansamento di e cantica aki, Tamara lo bay tin un evenemento den e concepto di ‘Food & Concert’ na Hulanda titula ‘A Mother’s Love’. E evento lo tuma luga na Teatro Mooi Weer & Zo, na Rotterdam riba diadomingo 12 di mei 2019, cu ta riba dia di Mama. Den un ambiente ameno y intimo, e cantante lo duna homenahe na tur mama, acompaña pa un banda ‘live’ unda e lo comparti su historianan personal. Durante e concierto aki, su single nobo ‘Mama’ lo keda interpreta pa prome biaha. Check riba www.tamaranivillac.com, pa mas informacion di benta di carchi. E cantica ‘Mama’ lo ta disponibel riba entre otro Spotify, iTunes, Apple Music, Deezer y tur demas plataforma di musica online y e videoclip ya ta disponibel riba YouTube. Por sigui Tamara riba rednan social na www.facebook.com/TamaraNivillac of Instagram@tamaranivillac. Pa presentacion por manda un mensahe na [email protected].
[embedyt] https://www.youtube.com/watch?v=hrr66biFIQ8[/embedyt]