Diamars mainta comerciante hoben Lindy Croes hunto cu Kimberly Kuiperi di Oranjestad Business Improvement District (OBID) a papia cu prensa pa comparti cu comunidad en general, detayenan di kico tur tin pa ofrece e siman aki den Caya G.F. Betico Croes relacion cu Dia di Mama. Croes ta coordinando un campaña di premio den cooperacion cu varios otro comerciante, mientras cu OBID, cual ta un aliansa publico-priva for di Ministerio di Asuntonan General, ta organisa e evento ‘T’Aki Tin’ cu actividadnan riba diasabra.
Lindy Croes a splica cu despues di e exitoso actividad di buscamento di webo, comerciantenan a dicidi pa un biaha mas bini hunto pa haci algo special nos mamanan. “E idea ta pa henter e siman ta andando un campaña cu yama ‘7 Days of Mother’s Day’ caminda full e siman bo tin chens di bin cumpra regalo pa bo mama of algo pa bo mes y lo bo tin chens di gana dos pasashi pa Orlando Florida hunto cu $500 di zakgeld,” Croes a splica. Tambe por gana un weekend stay na Renaissance Hotel pa cuater persona, un cena pa dos di Driftwood y hopi otro premio manera aparato, etc.
“E idea ta pa bo bin den caya y cumpra regalo na balor di 50 Florin of mas y bo ta haya un ticket pa participa. E ganador lo wordo saca dia 13 di mei na mi fashion show conhuntamente cu Penha y bo lo mester ta presente of un representante di bo mester ta presente pa gana e premio,” e comerciante hoben a splica. Pa mas informacion riba e atraccionnan di ‘T’Aki Tin’ Edicion Dia di Mama y di e campaña ‘7 Days of Mother’s Day’, por bishita e paginanan di Facebook: T’Aki Tin y Lindy Croes.