Tin hopi preocupacion andando pa motibo di cu DPL ta tardando cu peticionnan pa trahadonan di exterior. Minister di Labor, Sr. Glenbert Croes, ta splica e situacion na DPL.
Despues cu a kita e director for di su puesto y pone un Management Team, toch e peticionnan na DPL no ta canando. Sr. Croes lo kier pa DPL brinda servicio den 30 dia. Pero no ta eynan ainda. E retrasonan ta demasiado. E cuestion di cu’n hende mester warda pa mas di 5 luna pa un contesta. Tin hasta casonan den corte caminda cu’n cliente mester warda 8 luna pa haya un contesta. Y esey ta inaceptabel.
Te ainda tin cierto hendenan ta pensa cu e minister di Labor na mando ta esun anterior, cu su maneho ainda ta aplicabel den e departamento. Mientras cu e servicio no ta manera cu e mester ta pa e pueblo trahado, cu mester di e cooperacion y apoyo di DPL. E minister lo keda tras di DPL pa brinda e servicio manera cu e mester.
Un gran mayoria di e trahadonan den DPL ta dispuesto pa apoya e minister cabalmente pa nan esfuerso pa haci e relaunching cu e servicio ‘client-friendly’. Si e cliente ta haya un conseho positivo of negativo, e mester wordo argumenta.
Gobierno debe e cliente, e empresario un servicio lihe. Un servicio pensa, argumenta y evalua, y uno lihe. E cuestion cu mester warda pa lunanan largo pa un contesta ta inaceptabel. For di april, ainda no a yega pa duna e pueblo e servicio den 30 dia. Ta den proceso pa digitalisa e servicio di DPL. Pero tambe e apoyo cu e Management Team ainda ta eynan. E mandatario ta admiti si cu e criticanan ta funda.
E tin confianza cu den e proximo 3 lunanan, DPL lo ta na e nivel cu e ta. E mayoria di e trahadonan ta apoya e minister den su esfuerso. Ora cu saca DPL for di e pos scur di e ultimo 4 añanan, el a cana den sombra malo di e minister di labor anterior cu a daña e imagen di un departamento asina importante. DPL ta fundamental pa e pueblo Arubano y trahado.
E parti importante ta pa DPL yuda nos yiunan di tera, mamanan soltera haya trabao. Na momento cu DPL ta back on track, lo no tin mas luga pa uitzendbureaunan. E minister ta asumi responsabilidad pa e cosnan bon y e cosnan malo tambe. Pero e no ta asumi responsabilidad pa e ‘cliek’ cu ta echando baina ainda.
E mandatario ta gradici e trahadonan cu ta apoy’e y tambe e Management Team cu ta yudando e minister den e parti organisatorio, riba temanan di obhetivonan cu DPL mester cumpli cun’e, unda cu den 30 dia e cliente mester haya su contesta, sea ta positivo of negativo.
Tin cierto funcionarionan ta kere cu e poder ta di nan. E poder ey, ta di minister of funcionario di gobierno, cualnan salario ta wordo paga door di e pueblo, y tur debe pueblo un bon servicio, e mandatario a termina bisando.