Recientemente a wordo otorga un premio bon mereci, aunke no sorprendente, na e hotel iconico Hilton Aruba Caribbean Resort & Casino, presenta pa WeddingWire, un mercado online pa e industria di boda den 14 pais, incluyendo Estados Unidos, Canada, Spaña, Italia, Francia, Mexico, Brasil y India.
E compania, cual obhetivo ta pa simplifica bodanan rond di mundo, a presenta su premio mas codicia cu ta e WeddingWire 2019 Couples’ Choice Award na Lisa Dammerman, e Bridal Specialist di Hilton Aruba Caribbean Resort & Casino, cu ta e unico hotel na Aruba cu a ricibi e premio prestigioso akinan.
E WeddingWire 2019 Couples’ Choice Award a reconoce Lisa Dammerman pa su excelencia den calidad, servicio, capacidad pa contesta su clientenan den un tempo record, y profesionalismo den e industria di boda.
Lisa cu ta e experto den boda desde 2010 na e hotel, ta crea experiencianan unico pa tur e parehanan cu ta bin casa na nos isla tropical. Su specialidad? Reduci e stress di trata cu tur e vendors siendo leu di nos isla, y guianan den e parti di decoracion y catering, y mas importante ta capas di crea bodanan impecabel y impresionante na Hilton Aruba Caribbean Resort & Casino.
“Nos ta sumamente orguyoso di tin Lisa Dammerman como nos Bridal Specialist, y di por wak’e realisa e boda di soño di nos clientenan y di wak su profesionalismo wordo reconoci internacionalmente”, asina Chela de Lannoy a bisa, Directora di Catering & Conventions di e hotel.
Lisa Dammerman tambe a wordo reconoci aña pasa cu e WeddingWire 2018 Couples’ Choice Award como parti di e cinco porciento di e profesionalnan local di boda di e network di WeddingWire cu a demostra excelencia den calidad, servicio, capacidad pa contesta su clientenan den un tempo record, y profesionalismo.
E ganadornan di e premio aki ta wordo determina door di reviews como tambe encuesta haci entre clientenan satisfecho, cu ta consisti di mas di un miyon pareha recien casa di WeddingWire.
“Lisa tin e don di converti bodanan den recuerdonan unico, di rehearsal dinner te cu ceremonia di boda, e fiesta di boda of un brunch pa e dia despues di e fiesta. Su pasenshi y amabilidad sincero ta contribui na un bon relacion cu nos huespednan cu ta celebra e dia mas importante di nan bida”, Chela de Lannoy a conclui.