Algo cu ta hopi comenta den e comunidad ta e falta di motivacion pa decora nan cas of negoshi pa celebra 18 di Maart. Esaki pa cual pa algun aña caba no ta e caso pa cual a combersa cu Sr. Robert Maduro di Departamento di Cultura pa sa kico ta bay haci.
E aña aki Departamento di Cultura a uni forsa cu OBID, di Caya Grandi y tambe e organisacion di Ki Tin, cu tambe ta responsabel pa algun actividad den Caya Grandi, di moda cu por motiva e comerciante, cu a ricibi un peticion di parti Departamento di Cultura y tambe e peticion a bay pa e dos organisacionnan aki, pa duna un spirito mas participativo di nan establecimento, door di decora e vitrinanan, haci uzo di nos colornan di bandera. Motiva e personal pa bin bisti den e forma di trahenan tradicional/cultural y mas sigur lo tin tambe huradonan cu lo husga e vitrina miho drecha. Esaki no ta conta solamente pa Caya Grandi, pero pa Aruba henter.
Sr. Robert Maduro ta sinti cu mester bay bek na loke tabata e decoracionnan di antes, e smaak pa drecha cas etc. Di parti di organisacionnan, nan ta trahando duro pa rebiba Caya Grandi, nan unda e tabata antes, prome cu tur e renobacionnan a tuma luga, rebiba e custumbernan mester haci un esfuerso extra pa yega bek na unda tabata ta.
Tur esaki ta costa tempo, pasobra tin cu toch motiva e personanan aki, pasobra tin biaha tin un grupo di comerciante tabata t’ey pero esaki ta cambia. Y na ora di cambia, hopi di e comerciantenan nobo no ta na altura di nos custumber. E ora mester bay bek pa motiva nan pa asina haya e comerciantenan unda cu nan ta desea.
Por ultimo, Sr. Maduro a splica cu e turistanan y e sector hotelero a haya cartanan y informacionnan cu ta sali pa e area di hotel pa AHATA, pa diferente otro organisacionnan, cu na nan turno ta participa nan miembronan di e celebracionnan cu tin.