For di dia cu bandera di Aruba a keda oficialmente introduci riba 18 di Maart 1976, hunto cu nos Himno Nacional oficial ‘Aruba Dushi Tera’, a haci uzo di e significacion di colornan hancra den e ley AB 1991 no. 101 y despues revisa den AB 1991 no. 118.
E color blauw (PMS 279C) ta representa e lama inmenso cu ta rondona Aruba.
Geel (PMS 109C) e color di abundancia y e liňanan horizontal ta muestra di e solidez di tal abundancia. Geel ta representa e fuente di ingreso, e industria di antaño di oro, pero tambe ta e color di diferente palo y matanan cu ta floria, manera kibrahacha, brazil, bonchi di strena, curahao, tuturutu y wanglo.
E strea color cora (PMS 032C) di cuatro punta ta representa e cuatro direccionnan di e compas y ta simbolisa tambe e diferente paisnan for di unda e hendenan a bin Aruba y forma un comunidad cu ta biba den harmonia cu otro.
E color blanco (PMS blanco absoluto) na rand di e strea, ta simbolisa e santo blanco bunita di e playanan extenso, cu ta rondona nos isla y na mesun momento e puresa di curason di e habitantenan di Aruba, cu ta respeta husticia, orden y libertad.
For di varios aňa caba ta existi un desacuerdo di e sistema di codificacion di e colornan oficial di nos bandera y ta na aňa 2014 cu Gobierno di Aruba a dicidi pa bolbe fiha e colornan di nobo y a haci esaki conforme e sistema di codificacion di color categorisa actualmente.
E color blauw oficial awor ta Pantone Matching System (PMS 279C). Esaki ta e color cu ta yega mas cerca cu esun di 1976. Y awor segun ley y consicionan segun ley, articulo 11A mester haci un peticion pa un permiso di importacion y benta di bandera di Aruba na Departamento di Cultura Aruba.
Den combersacion cu director Interino drs. Astrid Thiel por a comprende cu lo inicia cu un campaña bastante intensivo p’asina trece conscientisacion encuanto e maheno di e sistema pa pidi permiso di importacion y benta.
Si no ta cumpli cu e rekisitonan segun e maneho lo tin sancion cu ta encera chens pa perde e permiso di importa y/of benta y un multa basico.
Lo por haya multa, dependiendo di e infraccion di leynan incluyendo lo siguiente:
-Cu permiso di importa of benta di bandera cu no ta cumpli cu e Ley (AB 1991 no. 101) e multa lo ta AWG. 1.000,=.
-Sin permiso di importa of benta di bandera, segun Ley (AB 1991 no. 101) e multa lo ta AWG 2.000,=.
– Benta sin permiso di bandera y cu no ta cumpli cu e ley (AB 1991 no. 101) e multa lo ta AWG 3.000,=.
Pa yega na e permiso mester haci peticion cu e informacion di entre otro, informacion personal, identificacion valido, registracion na Camara di Comercio y kende ta e persona huridicamente responsable. Mester trece un muestra di e bandera di Aruba cu lo importa of bende na Departamento di Cultura Aruba.
E permiso ta valido pa un aña, a no sea cu a kit’e prome cu e tempo stipula cu e peticionario/cargado di permiso no a mantene su mes na e reglanan segun maneho di e Ley di e desicion di e color corecto di bandera 2016.
For di Departamento di Cultura Aruba un comision a ser forma cu lo bishita tur e comerciantenan cu lo por importa y bende bandera y ta bende bandera usualmente pa informa riba e cambionan. Y despues lo controla si e usuario ta cumpli cu e stipulacionnan menciona.
Pa mas informacion por tuma contacto cu DCA via email [email protected] of tel.: 582-2185.
Departamento di Cultura Aruba ta situa riba L.G. Smith Blvd. 134, prome piso na Horizonte Building.