Apenas algun luna pasa ministro di Husticia a presenta cu orguyo su maneho nobo pa e 4 añanan benidero. Di berdad tabata trata di un hazaña impresionante. Pasobra e ultimo 7,5 aña e maneho di husticia bou di responsabilidad di e mesun ministro tabata vago y no a facilita (casi) ningun informacion (estadistico) tocante e situacion di criminalidad. Segun Armand Hessels di Fundacion Gobernacion di calidad Aruba, riba dje e ministro tabata limita su mes ora di presenta su maneho por ehempel pa medio di e presupuesto di 2017 na observacion vago y insignificativo manera cu ‘lo combati criminalidad cu forsa’ y cu ‘comunidad por conta cu e determinacion di ministro di Husticia’. Al fin y al cabo e mes aparentemente a bin compronde cu no por logra resulado tanten cu no a fiha un maneho cla.
Abuso politico partidista di finansas y personal publico
Sinembargo, ta straño cu ta presenta su plan di maneho poco prome cu su termino di ministro ta caba. Haciendo esey e ta impone un maneho riba su sucesor cu posiblemente no ta interesa pa ehecuta e maneho di su predecesor. Consecuentemente por considera e placa y personal publico cu e ministro sin ningun duda a dedica durante varios luna na fabricacion di e maneho como destruccion di capital. Di e manera ey e ta sirbi solamente pa crea e apariencia durante su campaña electoral cu di berdad (por fin!) ta traha segun maneho. Den e sentido ey ta uza placa y personal publico na beneficio di e campaña personal di un candidato politico partidista.
Lamentablemente e no ta e unico. Siman pasa a sali na cla cu prome ministro a cera un contrato dudoso pa Afl. 26.500,- pa luna cu e empresa Social Pop pa esaki propaganda e ‘prestacionnan’ di e ultimo 7,5 aña y mey di su Gobierno. Secretario di Conseho di Ministro a ricibi un creditcard cu un limite amplio pa cubri e gastonan di exposicion di e material cu a produci via internet, p.e. Facebook. Asina tambe ta probecha ampliamente di e medionan financiero di pueblo mientras cu alabes gobierno ta neglisha e stipulacionnan di ley en cuanto destaho.
Esaki ta pone na cla cu aki ta trata di un lucha desigual. Pasobra (partido di) Gobierno ta abusa sin ningun escrupulo di fondo publico, y esey den un tempo cu no ta ehecuta yen di tarea di Gobierno drechi pa motibo di falta di placa. Pero tambe ta envolvi director y personal di departamento pa core campaña durante ora di trabou mientras ta parce cu no ta cumpli cu e palabracion di paro di personal. Sin mas ta trata asina di mal gobernacion. Pero tin mas.
Ley Financiamento di Partido Politico
E contrato cu Social Pop lo ta complica den caso cu lo a legalisa e Ley di Financiamento di Partido Politico. E mal boluntad di partido politico di e ultimo decadanan pa introduci e ley ta indica hopi cla cu mester evita cueste lo ke cueste cu lo bin claridad den origen y destino di e placa di campaña. E impresion cerca esnan cu conocemento di e materia aki ta cu e falta di transparencia aki ta facilita e partidonan concerni pa logra financiamento for di e mundo baho cu asina ta laba e placa cu el a ‘gana’ ilegalmente. Ya caba e rapport Koerten (1995) a constata cu ‘funcionario Rubiano facilmente ta sigui motibonan comercial, priva of electoral incorecto. E deviacionnan aki ta tuma luga specialmente den e esfera material cu por tin consecuencia economico y social dañino’. Y mas aleu: ‘Esaki ta haci e riesgo di un deterioro di integridad grandi, specialmente si tin meta criminal den wega’. E proteccion cu sponsor criminal importante a yega di ricibi di parti di gobernante den pasado ta papia idioma cla den e cuadro aki. E echo cu ta sigui nenga rotundamente pa introduci e Ley di Financiamento di Partido Politico solamente ta reforsa e sospecha cu despues di 20 aña nada realmente a cambia.
Criminalidad organisa
E sospecha di ‘laso criminal’di parti di partido di gobernacion ta keda reforsa pa e investigacion husticial di e actividadnan di e ministro di Labor, na unda hasta tin e impresion cu por ta trata di criminalidad organisa dentro di e aparato gubernamental. Anke e lider di fraccion anterior di e partido di Gobierno recientemente a declara cu den un situacion asina e mes lo a tuma su retiro inmediatamente, poco despues el a vota, a base di e disciplina partidista, contra e mocion di desconfiansa y pro un mocion cu ta legalisa e suspension di e ministro en cuestion. Asina, tanto e como su partido ta indica implicitamente cu integridad no ta hunga ningun papel pa nan. Den e cuadro aki ta hipocrito cu hustamente e a permiti pa keda selecta pa ranca e garoshi di integridad pa IPKO.
Evasion di impuesto
Pero tin mas. Partido politico cu ta determina maneho di gobierno no solamente tin un gran bentaha pa motibo di e abuso di fondo y personal publico y obstaculacion di ley cu ta haci transparencia den nan financiamento di campaña posibel. Nan ta percura tambe pa mantene ley cu ta permiti evasion di impuesto riba escala grandi di parti di sponsor. Ya caba desde comienso di añanan ’90, yen di instancia a recomenda Aruba pa transforma e sistema complica y anticua (directo) di impuesto den uno hopi mas simpel y honesto (indirecto). E vakminister di Finansas actual hasta a laga e specialista famoso di impuesto Willem Vermeend diseña un sistema completamente nobo di impuesto. Sinembargo, na 2016 prome ministro a bari e modelo nobo ey for di mesa, a pesar cu ya caba riba termino corto esaki lo por a genera Afl. 100 miyon na entrada adicional pa Gobierno. Pero…alabes lo minimalisa e posibilidadnan di evasion di impuesto, y den tempo di eleccion na unda mester busca contribucion grandi di parti di sponsor cu mester por compensa esaki despues cu evasion di impuesto, esaki por forma un riesgo electoral grandi.
Republica di banana
Partido grandi y chikito di oposicion pa nos suerte (!) no por probecha di e posibilidadnan aki di financiamento di campaña. Esey ta haci di eleccion un lucha desigual. Di otro banda, comprension di e materia aki mester hiba na conclusion cu aki ta trata di un modus operandi coruptivo. Como tal e ta nifica cu ta desenmascara e partido di gobernacion. Esey lo mester hiba na un escogencia facil cu eleccion. Sinembargo, pa gran parti ta depende di e moral propio di e votador si atrobe ta scohe pa mantencion of, pio ainda, mas desaroyo di un republica di banana, of si por fin ta duna preferencia na desaroyo di un estado di derecho democratico.