E lipsticknan di e marcanan Chanel, Giorgio Armani y Estee Lauder ta entre esunnan cu ta content contaminante metalico, e Conseho di Consumidor di Hong Kong a adverti dialuna, segun South China Morning Post.
E entidad a analisa cerca di 30 marca di lipstick, lipgloss y lipstick likido disponibel na Hong Kong y a descubri cu 60% di nan ta contene nivel halto di cobalt, mientras cu 40% ta contene nivel halto di nickel. Ambos substancia ta alergeno (por causa alergia) y por provoca iritacion n’e cuero, cu ta manifesta como cascamento, rash (uitslag), hincha, kimamento y puistjes.
Durante test, e organismo a detecta nivel halto di un of dos metal den e productonan di e marcanan Giorgio Armani, Estee Lauder, Bobbi Brown, Make Up Forever, MAC, Lancome, Ettusais y NARS. N’e mesun momento, tambe nan a haya nivel halto di un tipo similar di metal den muestra di lipstick di L’Oreal Paris, Chanel, Tom Ford y Charlotte Tilbury.
Den e sentido aki, e Conseho di Consumidor di Hong Kong a señala cu e nivel recomenda di metal pisa alergeno ta di 1 milligram pa 1 kilogram. Sinembargo, e lipsticknan Pure Color Cream di Estee Lauder Lusterglass di MAC, como tambe e lipsticknan di Chanel y Giorgio Armani, a supera dicho nivel.
Fuera di esey e conseho a adverti cu a haya hidrocarburo yena di azeta mineral (MOSH) den 80% di e productonan analisa. Asina ey, e test a expone cu nuebe lipstick ta content nivel di MOSH cu ta supera e standardnan estableci pa Cosmetics Europe y e Organisacion Europeo di Consumidor.
Segun e medio Hongkones, MOSH por acumula den e tehidonan di e curpa humano, incluyendo higra, bofi y e kliernan limfatico, pero ainda no a relaciona nan cu e problemanan di salud a largo plaso.
E Conseho di Consumidor di Hong Kong a revela cu di tur e productonan pa lip analisa, e lipstick humectante reuzabel di Dior (Dior Refillable Hydrating Shine Lipstick) a obtene e miho desempeño den e test, demostrando ta liber di metal alergeno of substancia di azeta mineral.
“E conseho ta recomenda e fabricantenan pa pone atencion special n’e materianan prima cu por contene metal pisa alergeno y su concentracionnan y pa nan esforsa pa no uza materia prima cu ta contene metal pisa alergeno of pa minimalisa uzo di tal ingrediente mientras cu ta possible,” e organismo a señala.
Di su parti, representantenan di e companianan Ettusais, NARS, Lancome y Giorgio Armani a rechasa e conclusionnan di e entidad di Hong Kong y a afirma cu nan productonan ta sigur y ta cumpli cu e standardnan global. N’e mesun momento, e marca di luho Chanel a sigura cu e composicion di su cosmeticonan ta cumpli cu e normanan local y a pasa tur test necesario prome cu nan a wordo comercialisa.
Mientrastanto, e proveedor di producto Make Up Forever a bisa cu nan lo considera minimalisa e substancianan cu ta causa alergia y agrega fecha di vencemento riba e pakinan.
