CHICAGO, Illinois – E bida di un imigrante Mexicano di 90 aña, bendedo di caya di “paletas”, a cambia di un dia pa otro, danki na e solidaridad di mas di 11 mil persona cu den tres dia, a haci un donacion di mas di 250 mil dollar pa su retiro.
Fidencio Sangez, kende desde 23 aña pasa ta pusha su garoshi cu icecream di awa y den e bario Mexicano di La Villita di Chicago, no ta gana den su miho dianan mas di 60 dollar, cu ta su unico manera di sostene su mes.
E anciano a traha durante tur zomer desde 1993, pero despues di dos luna di a retira, debi na morto di su unico yiu muhe Juli ultimo, e mester a bolbe bay bende icecream pa mantene su mes.
“Mi yiu muhe tabata tur cos pami y mi casa Eladia. E tabata traha henter dia y di anochi e tabata cushina pa nos. Ainda nos no sa kico nos lo bay haci sin dje,” el a declara.
“Dios ta bendiciona nos y nos ta regresa contento,” pero e trabao di caya ta hopi instabil y den algun dia apenas ta bende “algun poco dollar”, e anciano a manifesta.
Un dia di siman pasa, sin posibilidad di stop di traha, y lastrando su garoshi cu dificultad manera tur dia, e anciano a wordo mira pa un “bon samaritano,” Joel Cervantes Macias, kende a cumpra 20 icecream pa 50 dollar y a dispone na haci algo mas ora el a haya sa di su historia.
E homber a publica un potret di e bendedo riba rednan social y e respuesta tabata inmediato, cu oferta di personanan cu kier yuda.
Cu e idea di recauda fondo pa e retiro di Sanchez, Cervantes a habri un cuenta riba GoFundMe cu e meta di logra 3000 dollar, pero un poco mas di dos dia, tabata tin 7000 donacion pa un total di 258.832 dollar y e suma a sigui crece.
Fuente: NTN24
