Ta prohibi pa subi of colga articulonan den e mata di fofoti na Eagle Beach

Oficina di turismo den su esfuerso -y manera delinea den su plan strategico pa proteha y fortalece nos medio ambiente- a tuma un stap concreto pa trece conscientisacion y proteccion pa cu nos naturalesa local. Aki nos ta referi na e palonan specifico, e matanan di Fofoti situa riba Eagle Beach – net dilanti Amsterdam Manor Beach Resort. E matanan aki a bira un di e icononan famoso di Aruba.

 

E matanan di Fofoti ta crece tur caminda na Aruba pero specificamente banda di lama, na unda esnan riba Eagle Beach ta esun mas famoso. E localidad aki ta wordo uza pa tur sorto di ocasion durante full aña y e ta un icono conoci mundialmente riba nos famoso Eagle Beach. Hasta den pasado e conocido negoshi internacional di IKEA tawata tin un potret den forma di un cuadra na benta den tur su negoshinan mundialmente.

 

A base di un peticion di e socionan di Amsterdam Manor Beach Resort, a traha dos borchi special y specifico pa asina crea conscientisacion pa cu e area di proteccion aki na unda e matanan di Fofoti ta wordo proteha pa nos ley local. E obhetivo principal di e borchinan aki ta pa educa nos bishitante como tambe local, cu no ta wordo permiti pa colga obheto den e matanan aki. Haciendo esaki, e por kibra e takinan di e mata cu awo ta un icono unda masha hopi potret ta wordo saca. Ademas, ta informa cu no mag di subi riba e mata di Fofoti mas, NA NINGUN MOMENTO.

 

E proteccion di e area aki ta di sumo importancia pa e paisahe visual di Eagle Beach pa tanto nos bishitante y nos localnan y pa e generacionnan binidero.

Comments

comments