E congresista Republicano Cory Mills, miembro di House of Representatives di Merca, a afirma den un entrevista cu Fox News cu e ta preparando articulo pa somete presidente Joe Biden na un huicio politico, pa su menasa pa para e ayudo militar Mericano na Israel.
Miles a acusa Biden pa forsa Tel Aviv na un situacion di “quid pro quo” (algo a cambio di algo) pa uza e dollarnan Mericano contra e accionnan di e Gobierno Israeli na Gaza.
“Joe Biden ta pone presion riba Israel, nos mayor aliado den Medio Oriente, door di a para su financiamento ya aproba den House of Representatives,” e legislador a denuncia, agregando cu “ta un mensahe hopi cla, ‘esaki pa esaya'”.
Di su parti, su copartidario Jim Banks, a señala cu “esaki ta solamente e ultimo di un lista largo di rason pa cuminsa cu un ‘impeachment’ contra Biden, entre nan e deadline pa e retirada for di Afganistan y permiti cu mas di 9 miyon migrante ilegal invadi ‘e frontera zuid di Merca.
E noticia a wordo publica despues cu Biden a indica e siman aki cu Washington lo suspende e mandamento di bom y proyectil di artilleria na Israel den e caso cu un invasio riba gran escala na Rafa, Gaza Strip, tuma luga. “Si nos mester ta nos so, nos lo ta nos so. Mi a bisa cu nos lo lucha cu huña si ta necesario, pero nos tin hopi mas cu huña, Y cu e mesun siguridad, cu ayudo di Dios, hunto nos lo vence,” e prome minister Israeli Benjamin Netanyahu, a declara den e contexto aki.