Den cuadro cu reduccion di costo di awa pa nos cunukeronan, den desaroyo di agricultura riba nos isla, WEB recientemente a caba di entrega e meter di awa na cunucu Goshen Farm. Minister Chris Romero a subraya cu e trayectoria aki a wordo inicia na 2018 despues di un par di luna apenas sintando den gobierno, caminda a tuma nota riba un di e preocupacionnan cu semper tabata reina ey’fo tabata tin di haber cu awa pa cunukeronan. E tabata un problema cu tabata causa cu hopi cunukero tabata stop pasobra e gasto di awa tabata sumamente halto pa nan. Unabes bo tin e gastonan aki, e ta haci dificil pa bo haci negoshi.
E mandatario a bishita Goshen Farm recientemente y expresa con e ta un placer y honor pa wak e lucha cu a wordo hiba y awe por cuminsa wak e fruto di esaki. “Sigur sigur esaki ta un di e cunucunan comercial di mas grandi cu ta produci pa trece esaki pa local, pero tambe nos tin etendi cu nan ta haci e pa un parti turistico tambe. Kiermen esaki sigur ta kico nos ta bogando p’e pa hopi tempo”, e mandatario a expresa. Awor porfin cu a logra e paso aki di baha tarifa di awa pa cunukeronan, for di esnan cu tabata tin landbouw meter for di 9,50 pa 5,50, un rebaho di 42%, cual ta contribui grandemente na nos economia.
Esaki ta un paso grandi cu no ta beneficia e comerciante pero tambe empleadonan cu por duna nan un tiki siguransa mas pa nan trabao. Hopi tabata interesa pa haci esaki y ora a cuminsa cu agricultura, a topa cu e problema di costo di awa. Esnan den pasado cu kier a haci e semper a wak esey como un problema, pero segun e mandatario, awendia nos sa cu e tecnologianan obtenibel awor modernisa caminda el a bira hopi mas eficiente, y awor cu e rebaho tambe di awa ta combini nan muchu mas.