Aceptacion ta trece solucion, y ta eynan ta unda cu nos como pueblo mester yega pasobra si tur hende keda den negacion y no asumi responsabilidad………esey lo ta e “ainda falta”. Pa un resultado diferente, nos mester haci cosnan diferente pa por cumpli cu e yamada cu nos Pais ta pidiendo pe. E futuro ta depende di nos…awo!
Durante Rueda di Prensa semanal di Gobierno, Minister Glenbert Croes conhuntamente cu Departamento di Asunto Social a duna un estado di cuenta di e Crisis Plan Social (SCP).
Durante e disertacion a comparti algun informacion di tur locual cu a colecta na datonan social pa 4 luna largo. Corectamente manera directora Glenda Hernandez a calific’e: nos ta den un drama social. Nos poblacion a redobla, nos servicio social no. Hopi hende ta sin trabou. Desempleo bou di e hobennan ta alarmante. 4 for di 10 mucha nunca ta termina un scol secundario. Hopi hoben cu ta cay cera y manera nan drenta KIA nan ta perde nan derecho di ensenansa obligatorio. Pa loke ta trata caso di abusonan di mucha, tin un lista di espera di dos ana prome cu nan por haya e atencion urgente cu e caso aki ta exigi. “Pues un coleccion di problemanan social alarmante cu tin nos tur babuca”, e directora a emfatisa. E luz positivo ta cu a cuminsa atende cu ne. Cu a cuminsa cu ehecucion di e Crisis Plan Social den cooperacion cu tur e experto y instancianan den e campo social. Nos a cuminsa! Y ta den un esfuerso colectivo SO nos por solucion’e. Ta momento pa como pueblo nos asumi responsabilidad. Ta momento pa como mama, tata, ruman, tanta, omo, welonan, y bisinanan nos lucha pa bienestar di nos prohimo.
Y na esun cu sa cu e ta den problema, busca ayudo. No tene berguensa. No carga e carga aki bo so. Departamento di Asunto Social ta duna bo guia, apoyo, sosten, asistencia pa yuda bo recobra un bida digno bek pa bo mes y pa bo yiunan. HUNTO nos mester rescata nos pais.
Nos ta na vispera di un ana di e fayecimento tragico y lamentabel di e dos angelitonan. Kico abo a haci diferente?