Tumando nota cu e temporada di awasero, a tene un entrevista cu sr. Wilmer Salazar pa asina splica nos tocante e situacion si por yega un brote di Zika, Chikungunya of Dengue. E ta bisa cu GKMB (Gele Koorts en Muskieten Bestrijding) importante pa por hiba un maneho eficiente pa e control di sangura.
Sr. Salazar ta bisa cu comunidad tin e yabi pa controla criadero di sangura, evita pa esey bin dilanti pa asina Aruba por disfruta un ambiente sin malesa y sin transmiti esaki. Awo cu tin awasero intenso, cambio di clima por trece consecuencia, pa e motibo aki mester ta prepara pa den caso tin caso por actua ‘ta miho preveni cu lamenta’.
E ta splica cu malesa nan aki por yega na tur hende. Dengue ta un malesa cu cualkier hende por haya complicacion sea ta hemoragia, sangramento, shock, e persona tin posibilidad di fayece. “Mester realisa cu dos infeccion di Dengue ta hiba na risico cu mas complicacion di morto”, e ta splica.
Pa locual ta trata Zika, e ta bisa cu e ta comporta suave, pero ta duna keintura, rash, e no ta dura mucho ‘4 dia maximo’ e no ta duna problema grandi, e risico di mas grandi ta hende na estado cu por afecta e mucha. E por causa cu e mucho su cerebro por inflame y afecta encephalitis cu e mucha por keda handicap pa bida.
Chikungunya ta malesa tambe cu por causa keintura, dolor di joints fuerte, e por bira un inflamacion cu por dura pa largo dependiendo pa infeccion. Mester evita tur e problema di sangura aki mirando cu ainda tin Covid-19 cu ta tratando cune.
Awo cu e temporada di influenza, sr. Salazar ta bisa cu mester tene na cuenta pa cuida e grupo di edad halto, esnan cu tin malesa cronico ‘e grupo di 60 aña cu tin risico cu si haya mas complicacion por bira grave y te asta fayece si tin Covid-19’.
Sr. Salazar ta bisa cu nan ta keda monitorea e situacion di desaroyo pa e tema aki. Mirando cu tin algun pais caba den area di isla nan Frances cu tin casonan di dengue mirando e awasero. Tambe region di Latino America manera Brazil, Colombia, Suriname y Argentina cu tin dengue. “Den tur region tin caso di dengue mester atento y evita pa e yega Aruba.”
Pa awo ta recorda tur hende pa keda sigui cu protocol di DVG pa usa mondmask, keda proteha na mes ta laba man, distanciamento social y usa handsanitizer, tambe pa evita aglomeracion te ora cu un vacuna Sali.