LA PAZ, Bolivia – Un hues a manda e gerente di e aerolinea LaMia, Gustavo Vargas Gamboa, pa prizon preventivo, te ora cu completa e investigacion riba e accidente na Colombia.
Hues Albania Caballero a cita “riesgonan di proceso” manera e rason di su decision. “Ta wordo determina e detencion preventivo di e imputado, Gustavo Vargas Gamboa, pa haya evidencianan di delito culposo y determina algun riesgo procesal,” e hues a bisa, despues di un audiencia cu a dura ocho ora.
No obstante, e hues a autorisa Gamboa sali di e prizon cu custodia pa somete su mes na revisionnan medico y sigui cu su tratamento di diabetes, cu a oblig’e na un transplante di riñon na 2013.
Autoridadnan di Bolivia a aresta su yiu homber, Gustavo Vargas Villegas, kende tabata director di Registro Aeronautico Nacional. Ministerio Publico ta kere cu el a comete varios delito na autorisa e importacion y e matricula provisional di e avion cu a cay cerca di e aeropuerto di Medellin, causando 71 morto.
Vargas Villegas a presenta su renuncia na e Registro Aeronautico despues di e accidente aereo. Investigacionnan riba e accidente di e avion cu a cay na Colombia, dia 28 di November a wordo reforsa pa e unificacion di e indagacionnan di e Ministerio Publico di Colombia, Bolivia y Brasil. E oficinanan ta indaga e presunto uzo di influencianan indebido di parti di ehecutivonan di LaMia y por investiga e Confederacion Sur Americano di Futbol.
Fuente: CNN en Español