Minister Michelle Hooyboer-Winklaar a reacciona riba e caso cu SMOA (directiva di Colegio Arubano) a entama contra Gobierno encuanto nombramento di un Rector Hulandes Europeo. E titular di enseñansa a declara su desapunto den tanto e Presidente di SMOA y e Directiva pa keda insisti cu ta un candidato Hulandes Europeo so por fungi como lider di e scol!
“Ta di lamenta cu SMOA ta bolbe entama un caso contra maneho di Gobierno. Manera mi a comunica anteriormente, Gobierno a informa SMOA cu e salario di e rector nobo cu kier nombra pa Colegio Arubano no ta subsidiabel debi na su edad (61), banda di e hecho cu nan intento ta pa nombr’e pa 5 aña. Esaki pa mi no ta aceptabel pa varios motibo. Na prome luga, esaki ta contra e maneho y ley di Gobierno stipula encuanto edad di pensioen y na ki momento un dirigente di scol lo baha cu pensioen. E maneho aki a wordo aplica pa varios aña y SMOA mes a aplica esaki na momento cu e Rector anterior Jossy Tromp mester a baha cu pensioen ora el a yega e edad di 60 aña. Si awor SMOA ta desea di haci un excepcion riba e maneho aki, lo por a haci esaki pa varios candidato local mas”, asina Minister Michelle Hooyboer-Winkaar a declara.
Minister Hooyboer-Winklaar a sigui splica cu a atende SMOA na mas cu un ocasion riba e ley y reglanan vigente pa ora di nombra un rector. Ta trata aki di loke tin stipula den entre otro e subsidieverordening, e ley y maneho nobo di pensioen, e bezoldigingsregeling di onderwijspersoneel y e uitzendregeling.
E mandatario a enfatisa cu ta e responsabilidad di cada directiva di scol pa tuma bon nota di e ley y di e reglanan existente pa ora di nombra personal y pa mantene nan mes na esaki.
Ainda por corda con aña pasa SMOA a pasa den un situacion similar unda cu a firma contracto cu rector Hans Timmermans sin cu a consulta cu Gobierno prome pa e subsidio. Den e proceso aki a resulta cu SMOA a neglisha y ignora varios ley y regla vigente pa loke ta suma di salario, edad y demas beneficionan secundario cu no ta aplicabel y cu Gobierno no ta subsidia.
Minister di Enseñansa ta lamenta cu SMOA den e caso aki atrobe no a haci su huiswerk prome cu a selecta e candidato y no a informa Gobierno na tempo riba e proceso, specialmente pasobra e Presidente di SMOA mes ta un empleado den Gobierno (Bestuurskantoor) y tin tur informacion na su disposicion.
“No ta prome biaha cu SMOA ta hiba Gobierno y mi persona Corte. Es mas, Colegio Arubano ta un scol cu ta gran parti subsidia cu placa di pueblo. Uzando placa di subsidio pa cubri gastonan di abogado en bes di inversionnan den scol pa mi ta cuestionabel. Ta notabel cu SMOA ta bolbe scoge un posicion contra maneho di Gobierno. Na aña 2015 SMOA a hiba nos Corte pa para e decision cu mi a tuma pa nacionalisa e normanan di admision cu consecuencia cu mas graduado di MAVO lo por a drenta Colegio Arubano. Nos a haya rason den e caso ey y mi ta kere nos lo haya rason e biaha aki atrobe. Mi ta keda cu e mesun opinion cu aki na Aruba mes nos tin educadornan capacita, motiva y experencia pa por fungi como Rector di Colegio Arubano. Pa hopi aña esey tabata e caso y mi ta convenci cu nos tin un candidato cla pa asumi e funcion aki”, Minister Michelle Hooyboer-Winklaar a termina bisando.