Sr. Gino Goeloe, director di Wit Gele Kruis, ta mustra rib’e importancia pa tur persona come na un manera saludabel.
E director ta splica cu personanan mester cuminsa come mas carni blanco, mas fruta, mas berdura y baha man na carni cora. Carni blanco por ehempel ta contene menos salo. Tambe ta conseha pa personanan cushina cu menos salo. E parti di movecion tambe ta importante. Cana por lo menos mey ora pa dia. No ta necesario pa bay gym so. Aruba tin varios caminda pa personanan por practica cana y move. Sitionan manera Linear Park ta gratis y pa henter publico. Te hasta por nota cu hopi biaha ta organisa algun actividad di movecion den Linear Park. Hopi hende ta bisa cu nan no tin guia pa yuda nan pa cu esaki. E ta splica cu tin parktijkondersteuners na cada dokter di cas y e lo duna e persona e ayudo cu e mester. E praktijkondersteuner t’ey pa yuda cu malesanan cronico manera diabetes y presion halto.
E factor di huma tambe ta uno cu personanan mester baha man na dj’e. Humamento ta cera adernan y por provoca atake di curason of stroke. Awendia tin varios forma pa yuda personanan pa stop di huma. Finalmente tin e factor di stress cu tambe ta afecta salud di forma negativo. Personanan mester por busca un forma pa biba un bida cu menos stress. Canamento banda di lama mes por ehempel ta un bon forma pa yuda baha stress.