E parti di e Cruise Comite, unda cu Aruba Tourism Authority conhuntamente cu Aruba Ports Authority, y tambe gobierno di Aruba, Ministerio di Turismo, unda cu ta establece strategia. Y un di e strategia ta pa trece un balans mas optimo den loke ta e tipo di barconan cu ta bin Aruba. Sr. Mario Arends, Cruise Manager di Aruba Tourism Authority ta splica.
Di un banda ta wak e desaroyo di e barconan cu ta bira cada biaha cu ta bira mas grandi, unda ta wak ta haya menos call. Den Low Season a haya 6 calls menos, pero a haya mas di 10 mil bishitante crucero. Tin Freedom of the Seas, Carnival Vista cu ta esunnan di mas grandi. Den e sentido aki, no por perde e desaroyo aki for di bista. Den e barconan cu ta wordo construi ultimamente tur tin e tendencia di ta hopi mas grandi. Na mes momento ta busca barconan cu ta mas chikito, pero cu ta trece otro tipo di turista crucero. Esey ta turistanan cu tin poder economico mas halto y eynan kier trece un balanse. Un di e retonan ta, cu un di e barconan aki no ta trece cantidad di turista halto, nan no ta liñanan cu tin hopi barco. Dus si logra haya bishita (calls) nan por ta un paar den un aña. Un ehempel ta e Ritz Carlton Yacht Collection, cu ta un di e barconan cu ta un profile mas interesante pa Aruba. Pero no por logra di trece e cantidad di callsnan cu ta wak di otro partnernan manera Carnival y Royal Caribbean.
Pero si ta traha pa tin e volumen ya cu tin cierto touroperatornan, cu ta proveedor di tournan, y pa esaki mester tin cierto volumen pa e industria por sigui draai. Pa esaki nan tin nan partnernan manera liña di crucero grandi pa ta sigur cu e industria ta sigui tin e volumen necesario pa esey. Di otro banda ta traha tambe cu otro destinonan manera Corsou, Bonaire, den e parti sur di Caribe pa conhuntamente sigui stimula e Southern Caribbean Cruising, cu ta beneficia Aruba hopi. Hopi biaha e barconan no ta yega te aki den caribe ya cu e distancia ta largo, e ta costa mas fuel. Y esey ta e retonan, pa cual ta bon pa traha cu ATA su partnernan strategico.
Tambe ATA ta trahando pa profila Aruba manera un ABC, unda cu lo traha mas di cerca cu nos islanan ruman. Pero tambe ta hayando interes di Guadaloupe y otro islanan den sur, cu kier traha hunto cu Aruba pa asina por ofrece itinerarionan cla caba, pa hala atencion di liñanan crucero. Y ta traha den diferente angulonan pa sigui desaroya y otro desaroyonan cu ta hopi positivo pa Aruba, manera Puerto Rico.
Puerto Rico ta sigui desaroyo como un HUB importante pa liñanan crucero y door di su locacion ta mas cerca di Aruba, Puerto Rico como un Homeport ta na beneficio pa Aruba, segun Sr. Mario Arends, Cruise Manager na Aruba Tourism Authority.