Lider di fraccion di MEP, sr. Rocco Tjon ta lamenta e ultimo sucesonan den e aparato hudicial. Sr. Tjon te referi na e desaroyo cu e ta señala den Cuerpo Policial, pero tambe e detencionnan di periodistanan. Sr. Tjon a bisa: “Ami no ta contento, esaki ta mi sentimento dilanti camera y tambe no dilanti camera”.
PROCESO HUDICIAL
Segun Sr. Tjon ta importante pa laga e aparato hudicial funciona sin wordo influencia. E sistema tin su propio “checks and balances” caminda mester tin permiso di Ministerio Publico pa un detencion tuma lugar. Un fiscal ta evalua esaki y durante e proceso e continuacion di e caso ta wordo evalua door di entre otro un Huez comisario tambe.
DESAROYO DEN CUERPO POLICIAL
Por a tuma nota tambe cu tin bastante inquietud den Cuerpo Policial. Entre otro riba e protocol di RST cu mester wordo firma na januari venidero. Parlamento ta wardando e ultimo version pa asina por scrutina esaki. Sr. Tjon a splica cu ta keda importante pa autonomia hudicial no wordo mina y na mes momento pa no perhudica existencia di niun departamento di Cuerpo Policial. E mesun punto di salida cu fraccion di MEP a fiha algun luna pasa ta keda existente.
Segun Sr. Tjon ta importante pa Cuerpo Policial uni aworaki. Mando policial y sindicato hunto mester atende cu e retonan aki y surpasanan. Pa asina Cuerpo Policial por sigui brinda seguridad na nos pueblo.