Un caso cu a hala hopi atencion recientemente ta esun di e hoben menor di edad cu a purba mata dos cacho cu un cuchiu. E hoben cu ta sufri di problemanan mental a wordo laga den libertad caba y esaki ta trece hopi preocupacion, pues un persona asina por bolbe ripiti e actonan aki.
Sra. Zoraida Conijn di Fundacion Luna a mustra cu casonan asina no por laga nan muri. El a splica cu a haci denuncia contra e hoben aki pa Aruba sa cu loke el a haci ta inaceptabel y cu e mester di ayudo. E fundacion mes mester a bay busca e cachonan pa sigura nan proteccion, pero awor ta keda pa esnan responsabel pa e hoben pa busca ayudo p’e. E ta mustra cu e hoben por bira un peliger pa bestianan, muchanan y te hasta su propio famia si nada wordo haci.
Pa loke ta Cuerpo Policial cu ta encarga pa ehecuta e ley di proteccion pa cacho y pushi cu tin añanan cu a wordo pasa den Parlamento, sra. Conijn ta lamenta cu autoridadnan no a tuma contacto cu nan of otro tanto fundacion cu tin pa bay busca e cachonan cu a core huy den mondi. Ademas, nan tabatin basta herida di e arma blanco cu a wordo uza riba nan.
Sra. Conijn ta splica cu e ley di cacho y pushi ta uno cu a wordo pasa sin un forma con pa ehecut’e corectamente. Si kita bestianan cu ta wordo maltrata for di nan doño, no tin caminda apropia pa pone nan. Y tampoco ta e intencion pa manda nan un sitio cu ta encarga pa matanan.
E cachonan actualmente ta bou encargo di Fundacion Luna y ta kedando na veterinario pa sigura nan recuperacion. Sra. Conjin ta splica cu e cacho bruin tin cortanan mas profundo y ta mas traumatisa cu e cacho blanco. E cachonan lo keda minimo 1 siman mas cerca veterinario y despues lo busca doño adecuado pa nan.
Finalmente, sra. Conjin ta splica cu tur e fundacionnan kier uni hunto y traha un carta den cual nan ta lista tur locual nan kier mira como cambio y consehonan riba con e situacion mester bay.