Durante un conferencia di prensa yama pa gobierno di Aruba, Prome Minister Mike Eman a hiba palabra, caminda cu el a splica riba e caso cu a tuma luga diamars mainta, caminda cu minister Paul Croes ta envolvi. El a splica cu ta un caso penoso, pero ora tin cu haci un investigacion, e mester ta mesun cos pa tur hende.
El a splica cu esaki ta un dia cu a conmove tur hende, caminda cu mainta tempran, rond di 6’or, cu el a haya un yamada di minister di Husticia, cu el a wordo informa door di procurador general, cu lo tin un huiszoeking na cas di minister Paul Croes y algun empleado di dje.
Naturalmente ta considera algo asina como algo sumamente penoso, manera ya menciona. Penoso pa e persona, penoso pa gobernacion di pais Aruba, penoso pa Aruba y ta kere cu ta importante cu na momentonan asina por duna comunidad claridad riba dos tema importante cu ta sigura tambe e orden legal di pais Aruba, caminda cu ta importante cu tipo di investigacionnan asina por tuma luga pa doloroso cu nan ta, cu nan ta tuma luga den un forma independiente y cu Gobernacion ta respeta tambe e independencia di autoridadnan cu ta encarga cu tipo di investigacionnan asina. Ta compronde cu el a bin a base di algun keho cu por a wordo duna. Detayenan lo haya sigur mas despues, pero sigur algo cu ta pone tur naturalmente para keto un rato y pensa riba e importancia di e stabilidad den nos pais. A caba di bin for di un mision na Hulanda, caminda cu tur e deliberacion a bay den contexto den e forma ehemplar cu Aruba ta posiciona su mes den reino, cu un vision cla, unda kier bay y cu un dedicacion grandi pa eleva e calidad di bida di nos hendenan y pa duna contenido tambe na e orden legal cu tin den nos reino y na Aruba mes.
Pa e motibo ey naturalmente, adicional, un noticia asina ta conmove tur hende. Gobierno ta desea tambe minister Paul Croes hopi forsa na e momentonan aki. Ta hay’e importante cu husticia cana su curso y gobernacion respeta esey tambe pasobra esey ta parti di e pilar importante di e separacion di podernan cu tin den un pais y pa e motibo ey tambe ta hay’e importante pa no simplemente emiti un comunicado, pero para tambe pa duna nos comunidad e siguransa cu nos ta mira cu momentonan asina pa doloroso cu nan ta, complica cu nan ta, ta momentonan tambe pa Aruba demostra un biaha mas e orden legal den nos pais, e confiansa cu tin den nos sistema hudicial y tambe cu e postura cu Gobierno ta tuma ta uno di responsabilidad. Uno tambe di solidaridad cu e minister envolvi, su famia, empleadonan cu na e momentonan aki ta pasando den e situacion aki, pero na e mesun momento tambe expresando e respet total pa e proceso legal cu tin cu cana su curso, pa asina na final husticia prevalece y cu nos comunidad por continua cu confiansa den su orden legal, cu confiansa den su organisacion y cu confiansa un biaha mas con Aruba por ta den comparacion cu otro paisnan, ta supera momentonan asina cu un sentido di responsabilidad y di serenidad halto cu ta cuadra tambe cu e imagen cu nos pais tin tanto den region pero sigur tambe internacionalmente, segun prome minister.
A puntra minister Eman kico lo bay pasa cu e cartera di minister Paul Croes si mira cu ta autoridadnan grandi a bin for di Hulanda y Aruba pa haci inval.
Segun prome minister awor aki ta prematuro y tin cu duna husticia tur su espacio pa cana y e minister tambe su espacio den e dianan aki por evalua e enbergadura di e keho, di e situacion cu tin su dilanti.
Pa Gobierno e noticia aki ta hopi nobo y tambe tin cu bay analisa nan den e dianan aki cu e mesun sentimentonan cu Prome minister a expresa, di solidaridad, cu e colega y esnan envolvi. Pero di un otro banda tambe, teniendo e respet pa e gobernacion di pais Aruba, respet pa e independencia tambe di nos sistema legal pa esaki por cana su curso, sin cu ningun momento tin algo di presion publico y politico riba e proceso aki.
E prome mandatario a sigui splica cu mirando cu ta trata aki di un minister y cu ministerio publico y autoridadnan a tuma e pasonan aki, ta algo cu Gobierno tin cu duna e seriedad necesario, pero na e mesun momento tambe, ta importante cu e minister ta bayendo cerca su abogadonan pa haya claridad. Hopi biaha personalidadnan mes tambe tin mester di un momento pa por inventarisa, averigua con e situacion ta, na e momentonan aki.
Gobierno lo bay analisa esaki, na e momentonan asina, no unicamente pa nan por cumpli cu locual cu nos orden legal ta bisa, cu nos sistema hudicial mester por traha independiente, hasta ora cu bo tin gobernantenan ta personanan cu ta forma parti di cualkier investigacion, pero tambe pa locual ta un pais caminda cu e orden legal di Aruba, ta un di e temanan cu hopi biaha a wordo acredita pe internacionalmente, hustamente pavia di e estado di derecho cu Aruba ta. Independencia den nos sistema di corte, independencia di nos ministerio publico. Ta temanan asina esencial den e orden legal di pais Aruba, cu nada cu Gobierno haci, mag di trece ningun momento na duda of stroba ningun proceso cu ta sali for di autoridadnan aki.
Tin di compronde cu minister Paul Croes ta bayendo su abogado. E ora ey p’e tambe ta hopi importante pa haya un claridad di locual ta wordo poni riba mesa, na e momentonan aki. E ora ey logicamente gobierno tambe ta haya informacion adicional. Cualkier decision cu minister Paul Croes tuma, of Gobierno tuma, mester ta basa riba informacionnan completo cu mester tin y pa Gobierno ta importante pa wak kico ta bin acerca den e informacionnan cu e minister mes a haya durante e momentonan cu a pasa awe mainta.