BRUSSEL, Belgica – E autor di e “atake terorista” riba un stacion di trein di Brussel tabata un maroki di 36 aña, husticia Belga a anuncia diaranson, sigurando cu a evita algo pio, ya cu e ekipahe cu el a rementa, sin laga victima, tabata contene “clabo y bomnan di gas.”
“E por a laga victima”, “e por tabata hopi mas pio,” vocero di e fiscalia federal Eric van der Sypt a bisa, precisando cu tabata tin “mas of menos un dies pasahero” rond di e atacante ora cu el a activa e carga explosivo. “Ta cla cu e tabata kier a causa mas daño di cual el a provoca,” el a añadi.
Belgica, unda un atentado a laga 32 morto na Maart di 2016, a rebiba diamars escenanan di panico, un dia despues cu un homber a dal contra musulmannan cerca di un mosque na London (un morto) y otro asaltante a muri den un atake fayido den Champs Elysees di Paris.
“A evita un atentado terorista na e Stacion Central,” situa cerca di turistica Grande Place, e prome minister Belga a bisa den un rueda di prensa, tras un reunion di ‘Conseho Nacional di Siguridad. “Nos no lo laga nos mes intimida pa e teroristanan,” el a agrega.
E sospechoso “a wordo identifica como OZ”, naci na “januari di 1981” y “di nacionalidad Maroki”, Van der Sypt a siguraden e rueda di prensa, kende a precisa cu e homber no tabata ficha pa hechonan di terorismo.
Segun e relato di fiscalia federal, e homber a drenta den e Stacion Central, unda cu el a dirigi na un grupo di biahero, cinco minuut despues. “El a tuma su maleta gritando y provocando un explosion parcial. Pa suerte, no tabata tin herido,” segun un comunicado.
A continuacion, el a bandona su ekipahe na candela, cu mas despues a registra “un di dos explosion mas violento,” y a dirigi su mes na e plataformanan en busca di un hefe di stacion, e relato ta continua. E ekipahe “tabata contene clabo y bomnan di gas”, el a agrega.
E homber, kende no tabata tin un faha di explosivo bisti, a fayece posteriormente pa disparonan di un solda riba ken el a precipita den e lobby di e stacion na grito di “Allah Akbar” (Ala ta e mas grandi), fiscalia a splica.
E hechonan ta wordo “cualifica di intento di asesinato terorista”, e vocero di Ministerio Publico specialisa den terorismo a indica, kende a haci cargo di e investigacion di e caso.
E cas di e autor di e atake, den e distrito di Molenbeek, a wordo registra den profundidad durante anochi, segun fiscalia federal. For di e bario aki a procede tambe personanan vincula cu e atentadonan di Paris na November di 2015 (130 morto) y Brussel lunanan despues.
E servicio di trein na e Stacion Central di Brussel, un di e mas grandinan di e pais y unda 60 mil persona pa dia ta tuma trein, a habri bek di nobo diaranson mainta, autoridadnan Belga a indica.
Tras e explosion, e servicio a wordo suspendi y e stacion evacua. “Tabata tin un movimiento di panico di e multitud na e stacion, hende a cuminsa core rond,” Arnaud Reyman, vocero di Infrabel, e concesionario di trein, a splica.
Segun Elisa Roux, vocero di SNCB, “un centenar” di persona a wordo evacua.
“Hendenan tabata yora, hende tabata grita. E tabata por supuesto un poco impacta,” el a agrega.
Belgica, hunto cu otro paisnan Europeo manera Francia y Reino Uni, tabata blanco di un serie di atentado Yihadista den e ultimo añanan.
Desde e atentadonan Yihadista na Paris na November 2015, reinvidica pa e organisacion Estado Islamico y perpetra pa e mesun cel cu a ataca lunanan despues na Brussel, soldanan ta patruya den e zonanan mas frecuenta di e capital.
Autoridadnan a mantene e nivel di alerta terorista 3 den un escala di 4, Michel a indica, kende a anuncia, puntrando pa un celebracion di un concierto di e grupo Britanico Coldplay diaranson anochi na Brussel, e refuerso di e medidanan di siguridad na eventonan concuri.
Fuente: www.elespectador.com