CALCUTA, India – Un cliente na India a denuncia e hayasgo den su cuminda y a presenta un keho na autoridadnan. Polis a cera di forma temporal e restaurant, caminda cu ya a cuminsa cu un investigacion interno.
E cadena di restaurant di fast food, McDonald’s a cuminsa diabierna un investigacion interno despues cu un cliente Indio a difundi potret di un lagadishi morto sirbi cu su batatanan.
Den un imagen comparti riba rednan social y difundi via medionan Indio, por a mira e lagadishi morto entre varios batata den interior di e tradicional cahita cora cu oro di e marca. AFP no por a comproba e autenticidad di e potret.
E incidente a tuma luga diamars ora cu Priyanka Moitra, un habitante di Calcuta, a bay busca su desayuno den un restaurant di McDonald’s.
“E ta vies! Oh, Mi Dios, tin un lagadishi den mi batatanan!”, el a pensa e ora, segun el a conta e canal di television NDTV.
“Mi a papia cu e responsabelnan di e benta di e zona, mi a papia cu e encargado, pero nan a haci manera nada,” el a añadi.
Moitra a presenta un keha na autoridadnan diamars atardi y polis local a cera e restaurant di forma temporal.
Diabierna, McDonald’s India a sigura den un comunicado cu nan a cuminsa cu un investigacion pa determina e causa di e incidente.
Fuente: El Espectador