DULUTH, Georgia – Un adolescente cu a disparce mas di un aña pasa a wordo haya bibo na Georgia y un homber di 31 aña ta enfrenta cargonan relaciona cu e caso, FBI a bisa.
Segun e vocero di FBI, Shelley Lynch, e hoben di 17 aña, a wordo reuni cu su mayornan despues cu el a wordo ubica durante anochi den un cas na Duluth, mas of menos 48 kilometer noordoost di Atlanta.
E agentenan a aresta Michael Wysolovski pa cargonan cu ta inclui delitonan sexual, crueldad riba menor y privacion ilegal di libertad.
E adolescente tabata tin 16 aña ora cu el a laga su cas cerca di Charlotte, North Carolina, na Mei di 2016.
Aña pasa, WBTV a informa cu e mayornan di e menor a haya un diario (dagboek) caminda cu e hoben tabata detaya su plannan di scapa cu un homber mayor, cu el a conoce via internet.
E tata di e hoben a bisa cu e homber “gradualmente a congracia cun’e.” Ta desconoci na e momentonan aki si Wysolovski tabata tin abogado pa e por a duna declaracion riba e tema.
Fuente: https://www.ap.org