Segun Sr. Dangui Oduber (MEP), ta parce cu pais Aruba NO tin gobierno. Benny Sevinger y Mike Eman ta invisibel, nan no ta contesta preguntanan di parlamento, nan no ta atende rueda di prensa y no ta atende cu preocupacionnan di pueblo tocante e proyectonan Green Corridor y Watty Vos Blvd.
Un prome minister invisibel asina aki manera Mike Emam a crea caos y desorden den nos pais. Corupcion na Aruba a yega na un nivel nunca antes bisto. Pueblo di Aruba y 6 futuro gobierno a wordo comprometi cu e proyectonan PPP Green Corridor y WattyVos Blvd cu lo costa e pagado di belasting casi 700 miyon florin. Nos a informa e pueblo aki cu negoshi ta wordo haci cu e proyectonan aki y tur 2 proyecto a wordo bendi. E bid pa Green Corrido ta wordo gana pa Odinsa, nan a bira bende e proyecto cu Mota Engil y na su turno Mota Engil a bende e proyecto cu Infrared. E otro proyecto WattyVos Blvd ta mesun cos. Mota Engil ta esun cu a gana e bid pa ehecuta esaki y a bira bende su stakes nan cu Infrared. Kiermen e compania Infrared cu ningun hende na Aruba a tende di dje ta esun encarga aworaki pa ehecucion di ambos proyecto. Loke pueblo kier sa ta cuanto miyon florin a wordo strica den e deal aki? Kende ta esunnan cu ta cobrando placa bao mesa cu tur e deal straño nan aki? Unda Mike Eman mes ta?? Mi ta reta Mike Eman pa bin dilanti y duna cuenta na pueblo pasobra placa di pueblo no ta cos di hunga cun’e! Mike Eman mester stop di sconde y duna nos hendenan un splicacion kico ta pasando den e proyectonan PPP.
E unico motibo pakico un otro compania ta tuma e proyecto over ta pasobra e lo saca ganashi y balor riba e proyecto. Kiermen na final di dia fiesta ta wordo haci cu placa di pueblo pa multinationalnan traha miyones di florin riba custia di e pueblo aki pa despues e miyones nan aki wordo reparti den e grupito di Friends with benefits di AVP. Tin un famia aki na Aruba a bira multimiyonario cu negoshinan di tereno y tambe negoshi di Green Corridor. Ta un abuso loke ta wordo haci cu fondonan publico. Mike Eman a abusa di e fondonan aki pa yuda y enrikece su hendenan. Con por ta posibel tin ministernan di e actual gabinete tin condominio na Miami. Di unda e placa aki a bin? E afpakteam cu tin na Aruba lo haci un investigacion cerca e ministernan pa wak di unda tur e placa ta bin? Con ta hustifica asina tanto luho? Acaso e salario di minister ta asina halto cu ta permiti asina tanto luho?
Un cos ta sigur, tur minister di e gobierno aki lo mester wordo investiga pasobra malversacion cu fondonan publico ta castigabel y e gobierno aki no por kere cu nan lo get away cu tur e bagamunderianan cu nan a haci.
E pais aki mester un gobierno drechi di hendenan responsabel cu ta gasta cada florin di e pagado di belasting na un manera responsabel. E pais aki mester un gobierno integro caminda gobernantenan no ta mira gobierno como un negoshi sino un vehiculo pa yuda e pais aki progresa. Nos partido ta cla pa asumi responsabilidad y nos lo percura pa stimula economia, crea empleo, combati criminalidad y percura pa nos tin un turismo solido y duradero caminda turistanan di berdad ta bin nos pais pa gasta placa.