Di parti di City Inspector ta keda pidi e pueblo campado pa por fabor ban cuida nos beachnan y medio ambiente, segun Sr. Marlon Pieters.
Sr. Pieters a enfatiza cu siguridad ta bin prome y limpieza tambe. Tur cos ta depende di e volgorde cu ta pone, pero tur dos ta bay hunto. Den e caso aki ta pone limpiesa prome y ta pidi pa ora di bay campa, pa zorg pa tin bari di sushi, e saconan pa yena sushi den dje y zorg tambe pa tin bon contacto cu e departamento cu ta bin recoge e sushi. Den e caso aki, Serlimar y tambe e otro compania lo bay hasi limpi. Den e caso aki, Sr. Pieters ta pidi tur hende pa si ta bin cu cosnan traha di palo, carton etc. No bin cu mita di un hardware store y lag’e na bo luga di campamento. Ta para den e vergunning, cu no mag di surpasa e cantidad di tent of trailer. Doñonan di trailer, of e vergunninghouder, ora di control e mester ta eynan presente.
Pa loke ta regarda siguridad, boter pa paga candela, ehbo- doos, tene bo mes na reglanan di siguridad. E cobamento tambe, e bbq, no por wordo haci ariba e santo blanco, mester haci’e ariba e parti duro.
Logicamente, polis ora cu e bin control, unda cu e haya e persona ta haci e bbq, tin sancionnan cu por wordo duna. Mester corda cu ta un beach blanco Aruba tin y si bay dañ’e e ora ey no lo bay tin beachnan blanco mas aki poco aña.
Semper ta e sushedad cu e hendenan ta laga atras, cupsnan den awa, boternan bashi y e dolor di mas grandi cu tin ta e hendenan cu ta durf di cende un kampvuur riba e santo blanco. Aña pasa polisnan a parti dos boet, pa hendenan cu a cende kampvuur ariba beach.
E vehiculonan, 4wheel drive, quadracer, no bay cu nan ariba beach, awo ta temporada di ponemento di webo di e turtuganan. Na niun beach no ta permiti pa core cu e quadracer, solamente si ta polis nan ta permiti. CIty Inspector tambe mag, pero nan no ta haci’e. No ta cumbini niun hende pa tur core ariba e santo blanco. Tene cuenta kico bo funcion ta y laga esunnan, sea ta polis, brandweer, militair, Rode Kruis of City Inspector, laganan haci nan trabao y ta spera cu tur hende pasa un Semana Santa safe and sound, segun Sr. Marlon Pieters, di Bureau City Inspector.