Errol Sjak – Shie (DIP): ‘No ta mishi cu groengebied ni natuurgebied’
Ta evalua areanan cu ta bin na remarca pa vivienda a base di e ROP
Actualmente tin diferente trabou di inbreiding y verkaveling tumando luga rond Aruba. Pa locual ta trata e besindario di Yara, director di DIP Errol Sjak-Shie a splica cu den cuadro di e maneho actual di Ministerio encarga cu Desaroyo Teritorial, Infrastructura y Medio Ambiente, a stipula cu riba tereno di vivienda, intencion ta pa cumpli cu demanda di vivienda entre otro e peticionnan cu tin na DIP pa tereno.
Vivienda ta un di e gran necesidadnan cu tin mirando e desaroyo cu a tuma luga na Aruba y e scarsedad cu te ainda tin riba e mercado di vivienda, sr. Sjak – Shie a inicia splicando. Den cuadro di esey, ta trahando riba diferente area cu por traha verkavelingsplan of inbreidingsplannen pa ofrece tereno na hendenan. E punto di salida eynan ta segun e (otro) maneho di Minister Otmar Oduber, esta e Ruimtelijke Ontwikkelingsplan (ROP) cu ta e base di e maneho pa loke ta toka desaroyo di e teritorio di Aruba. For di esey ta sortia cua ta e areanan cu segun e ROP ta destina pa desaroya como vivienda y a base di esey ta diseña e areanan aki.
Yara igualmente cu otro plannan cu tin, ta cay segun ROP den un di e areanan cu ta pa vivienda di Savaneta y bicindario y como tal e ta bin na remarca segun e maneho pa desaroya terenonan pa construccion di cas conforme e ROP. Esey a sosode den e caso aki tambe, unda cu Yara cu e plan cu tin y considerando cu e ta cerca di un area natural, a tene cuenta cu e aspecto di naturalesa. Ta importante pa informa cu groengebieden ta keda liber. Ora nos (DIP) ta den e proceso di evaluacion di e areanan cu ta bin na remarca, ta evalua si e area ta cay den groengebied, natuurgebied, of den area cu por desaroya vivienda. No tin intencion di mishi cu e groengebied, ni e natuurgebied!, Sr. Sjak-Shie ta enfatisa.
Tin mas o menos 27 area rond di Aruba cu nos a evalua, e proceso ta lo siguiente: Ta identifica e area a base di e mapa di ROP, ta traha un lista di e area, despues ta bay wak e terenonan a base di esaki ta valua si tin otro puntonan cu mester tene cuenta cu ne. Un di e puntonan ta por ehempel, con cerca e ta di naturalesa manera un rooi entre otro y despues ta desaroya e plan. Te aworaki no tin e reglanan pa locual ta rosamento, sinembargo manera Minister Otmar Oduber a informa, entrante otro aña lo personanan mester un permiso prome cu rosa tereno, sr. Sjak – Shie a conclui.