LOS ANGELES, California – Un hues federal di Los Angeles (Merca), a emiti dialuna un orden di aresto contra e cantante Luis Miguel, door di nenga den varios ocasion na aparece dilanti corte Mericano pa e caso cu e ta enfrenta contra su exrepresentante William Brockhaus.
Segun e documentonan hudicial di e caso, dia 24 di Maart, e mesun tribunal a adverti e cantante cu si e no presenta dialuna na e audiencia cu tabata premira pa tuma luga na e ciudad Californiano, lo duna luz berde na forsanan di siguridad pa nan por bay detene.
E abogado di Brockhouse, Amy B. Messigian, a sigura cu e hues federal Virginia A. Phillips, a firma na Los Angeles e orden di aresto contra Luis Miguel “door di ignora e mandato.”
Brockhaus a exigi den su demanda na Luis Miguel un indemnisacion di algo mas di un miyon di dollar, incluyendo interes y honorarionan di e abogadonan, pa incumplimento di e contrato ora cu e tabata eherce como representante di e musico conoci como “El Sol”, entre 2013 y 2015.
E evasivanan di Luis Miguel pa aparece dilanti corte a uni na e decision di e hues Phillips na Januari di confisca un auto di luho di marca Rolls Royce di e cantante, pa por cubri e cargonan den su contra.
Fuente: Globovision