ALEMANIA – Tres solicitante di asilo Sirio a wordo deteni diamars na Alemania bao di sospecha di colabora cu e grupo terorista autodenomina Estado Islamico (ISIS), segun a informa diamars un vocero di e Oficina Federal Criminal (BKA) na un medio local.
Efectivonan di BKA y di un unidad special di Polis federal a registra diamars riba orden di e Fiscalia tres centro di acogida di refugiado y varios apartamento den e estadonan federa di Schleswig-Holstein y Nieder Sachsen, nort di e pais.
E agentenan a confisca varios celular, soporte di almacenamento di dato y documento.
Segun informacionnan di “Die Welt”, e tres sospechosonan tabata wordo investiga pa BKA ya pa varios luna despues di a ricibi un indicacion di parti di e Oficina Federal pa Proteccion di e Constitucion – e servicionan secreto di interior – riba posibel Yihadistanan.
Tras ricibi e advertencia, BKA a crea den e districto Berlines di Treptow, e grpuo di instruccion “EG Galaxy”, cu ta encarga di interveni varios telefon, scucha conversacionnan durante varios siman y observa e sospechosonan.
Segun fuentenan proximo na e investigacion, ainda no ta cla si ta existi evidencia cu ta confirma efectivamente e sospechonan contra e tres detenidonan.
Ya na principio di Augustus, un Sirio di 24 aña a wordo deteni den e localidad di Mutterstad, den e stado federa di Nordrhein – Pfalz (west) bao di e sospecho di terorismo.
E refugiado, registra den e estado federa bisiña di Nordrhein-Westfalen, a yega na principio di 2016 na e pais.
Segun e version di otro solicitante di asilo cu a keda deteni, e hoben Sirio tabata planiando un atentado na Alemania riba orden di EI.
E forsanan di siguridad no a haya indicacion cu ta confirma e sospechonan y e hoben a wordo poni den libertad un biaha mas.
Actualmente, BKA ta conta cu mas di 400 advertencia contra refugiadonan sospechoso di terorismo.
No obstante, den mayoria di e casonan ta trata di acusacionnan falso of senciyamente di confusion.
Ainda asina, den 60 caso, a habri un investigacion.
Fuente: NTN24