ARMENTIERES, Francia – Polis Frances a detene dos agente Belga cu tabata transporta den nan ven 13 imigrante pa un ciudad fronteriso nort di Francia, autoridadnan a informa diahuebs.
E dos agentenan a wordo transporta diamars anochi pa e warda di polis di Armentieres, un localidad Frances fronteriso, pa wordo interoga, prome cu nan a wordo libera, e prefectura a afirma.
E polisnan Belga a splica cu nan a haya e imigrantenan riba caminda y cu “nan no kier a laganan bay na pia te na e frontera” Frances.
“Nos a hibanan pa e direccion cu nan kier a bay,” Georges Aeck, un di e polisnan implica a splica na un radio Belga.
Despues di e incidente, e minister di Interior Frances, Bernard Cazeneuve, a convoca na e embahador di Belgica, Vincent Mertens de Wilmars, “pa pidi splicacion” y expresa su descontento, e ministerio a splica.
Sin embargo, Belgica a nenga cu su embahador lo a wordo convoca. “Nos pais no tabata tin cu rindi cuenta y nos embahador no a wordo convoca,” Anne-Laure Mouligneaux, a sigura, kende ta vocero di e minister Belga di Interior, Jan Jambon.
Di su parti, Jambon tabata kier a relativisa e gravedad di e incidente. “E regla preciso ta cu tin cu hiba e refugiadonan te na e frontera. E problema aki ta cu e frontera riba e caya eynan no ta hopi visibel,” RTBF a declara. “Ta un incidente chikito, no ta gran cos,” el a agrega.
Entre e 13 imigrntenan, tres menor a wordo ubica den centronan di acogida y dies adulto ta den detencion administrativo mientras cu ta investiga su situacion, autoridadnan a indica.
Mas di 300 mil imigrante y refugiado a yega Europa pa loke ta 2016, despues di crusa Mediteraneo, segun e Alto Comisionado di Nacionnan Uni pa Refugiadonan (ACNUR). Entre 6900 y 10 mil imigrante ta biba den e campo di imigrante di Calais (nort di Francia), conoci como “The Jungle”, unda cu nan ta warda un chens pa crusa bay pa Inglatera.
Fuente: NTN24