MEXICO – Den e interior di e piramide di Kukulkan, na Chichen Itza, tin scondi no uno, sino dos piramide. Asina e Universidad Nacional Autonomo di Mexico (UNAM), a anuncia diahuebs, despues di un investigacion cu tecnologia di punta cu a permiti haci e descubrimento.
Cientificonan di e Instituto di Geofisica, di e Facultad di Ingenieria di UNAM y di e Instituto Nacional di Antropologia y Historia (INAH), a traha hunto uzando un tomografia, un tecnologia unico den mundo caminda cu por observa e structuranan interno di e piramide pa wak su etapanan reconstructivo.
Ta trata di e segundo piramide scondi, descubri dentro di e tempel di e compleho di Chichen Itza: e prome a wordo detecta den añanan 30, segun UNAM a informa. E recientemente haya ta ubica den e interior di e prome.
“Por observa un rampa, siguramente un escalinata y e probabel existencia di un adoratorio. E haltura di esun mas bieu (descubri pa e universitarionan) ta rond di 10 meter, mas e adoratorio menciona y esun haya den añanan 30, ta di 20 meter,” UNAM ta afirma.
Segun e universidad, e descubrimento lo permiti conoce mas informacion riba e periodonan inicial di e poblacion di e luga y di e evolucion di asentamento.
Na Augustus di 2015, e ekipo aki di investigacion a descubri uzando e mesun tecnica cu e piramide Maya aki tabata construi riba un curpa di awa.
Segun UNAM a reporte e tempo ey, tin un curpa di awa “cu di nort pa zuid ta midi mas of menos 25 meter y den su parti mas alarga di 30 pa 35, cu un profundidad calcula den un poco mas di 20 meter.”
Rene Chavez, di e Instituto di Geofisica, a afirma tras di e descubrimento aki cu ta posibel cu e piramide ta sink, aunke cu no lo sosode pronto. “E tipo di structuranan aki ta cambia cu tempo, pasobra e awa ta laba e murayanan y e cavidad por bay aumentando. Den algun momento, si e parti diki di e piedra abao di e piramide bira mas fini, e por tin un problema di stabilidad y El Castillo lo colapsa. Sin embargo, esaki ta algo cu nos lo mira den hopi generacion mas,” UNAm a cita, afirmando esaki.
Fuente: CNN en Español