LONDON, Inglatera – Cientificonan na Portugal a desaroya un tecnica nobo pa elimina den ratonnan neuronanan situa pafo di e celebro y actua riba e procesonan cu, por ehempel, ta causa obesidad, segun un estudio publica pa e revista “Nature.”
E investigacion, lidera pa e Instituto Gulbenkian di Ciencia (IGC), a identifica neuroanan di e sistema nervioso periferico cu ta actua riba e tehido adiposo y a constata cu su eliminacion a provoca un significativo y rapido aumento di peso den raton.
E tecnica aki, ta sigura su responsabelnan, habri e porta na un estudio di un gran cantidad di enfermedad relaciona cu e sistema nervioso periferico y cu otro celulanan localisa pafo di e celebro, Efe a splica.
IGC, den colaboracion cu e Universidad di Santiago de Compostela (Spañ), e Universidad Cambridge (Reino Uni) y e universidadnan Mericano di Yale y Rockefeller, a duna asina un paso mas den e estudio di e mecanismonan neurobiologico implica, entre otro, den obesidad.
Recientemente, IGC, cu e experto Ana Domingos na cabes, a descubri cu e activacion directo di e conhunto cita di neurona, cu ta inerva e tehido adiposo den raton, ta hiba na e organismo na kima vet.
Pa e estudio nobo aki, expertonan tabata kier a comproba si e eliminacion di e mesun neuronanan periferico aki tabata provoca e efecto contrario den e ratonnan.
Na comproba cu e animalnan tabata aumenta nan nivel di vet, cientificonan a confirma cu ta posibel actua riba e neuronanan aki sin afecta otro similarnan cu ta wordo localisa den e celebro.
Fuente: El Universal