Tin hopi hende miedo pa bira miembro di un sindicato pa cual abogado mr. Jose Figaroa ta kere cu no mester tin e miedo aki. Ta derecho fundamental di tur trahado pa afilia su mes na un sindicato y mr. Figaroa no por mira un desbentaha pa e trahado na momento di join sindicato FTA.
E ta mescos cu cumpra un seguro, y no ta cumpr’e paso ta haya un accidente. E ta un caso di por si acaso, pa bo tin’e. Mescos ora di drenta sindicato, e trahado no ta spera cu e ta bay perde trabao y nan lo zorg pabo. Pero por lo menos tin un sindicato. En berdad, tur sindicato tin un gasto, pero esey ta minimo compara cu e beneficionan.
Na momento cu e trahado hay’e den problema cu su dunado di trabao, e no tin ken pa e yama y pidi conseho. E sindicato ta fungi tambe como intermediario entre e trahado y e dunado di trabao. Pues, mr. Figaroa no ta mira motibo pa bisa cu no, no e trahado no mester di sindicato. Un biaha mas, mr. Figaroa ta enfatisa, cu kisas pa un temporada e no ta necesario, pero na momento cu cos pega ta bon pa tin un hende den bo banda y un sindicato serio ta e miho opcion.
Si e trahado ta sinti cu kisas cosnan por bay cana malo den futuro, ta un bon momento segun mr. Figaroa, pa e trahadonan afilia na un sindicato. Y pa zorg pa por si acaso, cu cos bay malo, tin un hende cu por defende e trahado y para pa e derecho di e trahado. Y cu por yuda cu en todo caso, e efectonan pa e trahado ta lo mas minimo posibel.