MARGARITA, Venezuela – Perdida di un piesa antiguo di e relikianan di e Museo Diocesano di e Virgen del Valle na isla di Margarita, a wordo reporta pa autoridadnan eclesiastico di e estado di Nueva Esparta.
Aunke e hecho a sosode aparentemente algun luna pasa, no tabata sino te awor aki cu e informacion a trascende na medionan di comunicacion.
Pastoor di e Basilica Menor, Luis Eloy Serrano, a confirma cu ta un replica di e brug “Maria Nieves” traha di oro y perla, riba e Riu Apure, dona na 1963 pa e empresario Margariteño Manuel Perez Marcano.
E falta a wordo detecta pa famianan di e devoto di la Virgen, cu ta custuma pa bishita e lua religioso y sorpresivamente a descubri cu e “brug” cu tabata den e Salon de los Milagros di e Museo Diocesano no tabata tey. Serrano a afirma cu ta investigando e caso, pues como tur Museo, ta un luga protegi y cu normanan di siguridad.
Parce cu e robo a tuma luga ora cu un funcinario di e museo tabata translada e piesa pa un kluis den su auto.
Fuente: El Universal