Un ekipo di cientifico a crea un substituto di carni fo’i mushroom cu ayudo di ingenieria genetico, segun un estudio publica diahuebs den e revista Nature.
E investigadonan di e Universidad di Berkeley, e Instituto Conhunto di BioEnergia (Merca) y e Centro di Biosostenibilidad di e Fundacion di Novo Nordisk (Dinamarca), a tuma e mushroom ‘Aspergillus oryzae’, conoci como koji, pa efectua modificacion den su genoma y transform’e den un fuente di alimento.
Concretamente, e produccion di e hemo di e mushroom a aumenta, un molecula a base di hero presente den hopi organismo, cu ta duna carni su colo y sabor caracteristico y di ergotoneina, un antioxidante asocia cu beneficio pa salud cardiovascular.
Despues di a introduci e cambionan aki, e mushroomnan, cu prome tabata blanco, a bira cora y door di elimina e exceso di awa y machic’e, por a duna nan e forma di hamburger.
Awo, e cientificonan ta busca cu e mushroomnan aki ta mustra mas apetecibel mediante modificacion di e gennan cu ta controla su textura. “Nos ta kere cu tin hopi margen pa explora e textura modificando e morfologia fibroso di e celnan. Asina, nos lo por configura e structura di e fibra di e mushroomnan pa nan ta mas largo, loke lo duna un apariencia mas parecido na carni,” e bioingeniero Vayu Maini Rekdal, co-autor di e estudio, a señala.