HELSINKI, Finlandia – Un grupo di investigado di e Universidad di Turku (Finlandia), a desaroya un aplicacion mobil cu ta permiti deteca atakenan di curason di miocardio uzando sensornan di movimento di smartphones, e Centro Universitario a informa.
E aplicacion, cual version di prueba lo ta disponibel na 2017, ta aplica sensor manera giroscopio, preinstala den tur modelo di iPhone y den hopi dispositivo Android, pa midi e micromovimentonan rotarorio di e cavidad toracico cu solamente pone e mobil riba e pecho durante dos minuut, EFE a divulga.
Posteriormente, e aplicacion ta uza un algoritmo pa procesa e datonan y detecta posibel anomalianan den e funcionamento di e curason.
Segun e investigadonan Finlandes, si e pashent registra prome e movimentonan di su curason den condicionnan normal, e aplicacion ta capaz di detecta un eventual atake di curason cu un precision superior na 90%.
Ora cu ta perturba e fluho di sanger pa e musculo di curason, e micromovimentonan aki den pecho ta wordo afecta y e telefon por sinti’e, e director di e proyecto, Tero Koivisto, a afirma.
Ora cu un pashent sinti un dolor den pecho – e ta splica – solamente em ester pone e mobiel riba e curason y e aplicacion lo duna un diagnostico dentro di dos minuut, despues di recoge y procesa e datonan.
Segun e investigadonan Finlandes, detecta e infarto di miocardio manera cu e prome sintomanan ta aparece, ta fundamental pa por ricibi atencion medico lo mas pronto posibel.
“E infarto di miocardio ta wordo causa pa un obstruccion den e ader principal cu ta suministra sanger rico den oxigeno pa e curason. E parti di e musculo di e curason cu ta sufri pa falta di oxigeno por sufri dañonan permanente y por lo tanto un invervencion clinica urgente ta hopi importante,” e profesor di cardiologia, Juhani Airaksinen, a splica.
No obstante, ora cu algun pashent ta sinti sintomanan manera dolor den pecho, tin biaha ta kere eroneamente cu ta algo transitorio of cu ta debe na otro causanan, loke por tin consecuencianan fatal, segun investigadornan.
“E aplicacion aki ta pretende anima e pashentnan pa busca atencion medico mas rapidamente. Nos obhetivo no ta pa descarta atakenan na curason, sino pa duna un señal na e pashent ora cu ta trata di un emergencia real,” Koivisto ta sigura.
Enfermedadnan cardiovascular ta e causa mas comun di morto na mundo, segun e expertonan, y di nan, e infarto agudo di miocardio ta figura entre esunnan mas habitual.
Fuente: El Universal