E siman aki, henter mundo lo conmemora e di 50 aniversario di e guera conoci como e “Guera di 6 Dia” of “Guera di Juni, 1967” entre Israel y su bisiñanan Arabe. Den mi buki Un Arubiano na Libia, mi ta conta di mi experiencianan personal na Tripoli durante y despues di e guera. Mi tabata aya como empleado di Esso Libia den Computer Department. Awe mi kier recorda e guera contando algun anecdota saca di e buki. Tur placa di benta di e buki “Un Arubiano na Libia” ta bay pa Koningin Wilhelmina Fonds (KWF). Mi ta urgi tur lesado pa cumpra e buki. E ta lesa facil; e ta entretene y educa. Alabes bo ta yuda KWF preveni y combati cancer.
Ami a tende e noticia di e atake di Israel riba su bisiñanan Arabe durante oranan di mainta mientras cu mi tabata na oficina. E empleadonan Libio a baha na awa mesora mientras cu e expatnan (Mericano y Ingles) tabata purba sigui traha normal. Pa mas o menos ora di lunch, un banda grandi di Libio, obviamente hopi rabia, a marcha den direccion di nos oficina. Nos a cera tur bentana y traha baricada tras di e portanan. Aparentemente, Hussein di Iraq y Nasser di Egipto a denuncia (falsamente) cu Merca y Inglatera tabata participando cu Israel den e guera y esaki a pone e Libionan furioso contra tur empresa Ingles y Mericano.
Nos oficina, separa pa djis un hanchi small for di e embahada di Merca, a bira un blanco pa e bandanan cu aparentemente blo piedra nan tabatin pa tira. Hopi piedra cu tabata destina pa dal contra e embahada a bin dal riba nos edificio. Jim Byrd, un colega cu oficina riba e di cinco piso, a “debolbe” e piedranan cu a cay riba nos dak. Nos tur tabata spanta, pensando kico lo por pasa si e banda mester perde cabes y ataka nos di berdad. Danki Dios, despues di algun ora, cos a calma basta y nos por a bay cas, yen di susto ainda.
Mi tres yiunan tabata na cas caba ora cu ami a yega. Nan tabata preparando manera loco pa bay tuma e bus cu lo hiba nan Wheelus Airbase pa nan wordo evacua. Aparentemente, tabatin un ordo di embahada pa evacua tur famia Mericano. Esso Libya a regla pa mi señora y yiunan, aunke Hulandes, tambe cay den e grupo aki. Ningun hende tabata sa pa unda nan lo evacua nan. Nos, e hende hombernan, mester a keda na trabou.
Mi señora y mi tres yiunan a bay Wheelus Airbase cu un bus for di Oil Companies School. Despues di warda hopi ora nan a subi un avion transportador C-130 Hercules di Air Force Mericano rond di meyanochi, sin sa na unda nan tabata bayendo. E siguiente dia mi señora a yama mi pa bisa mi cu nan ta na Napels. Esso Italiana a pone nan den un hotel hopi bon y cu el a haya algun shen dollar di Esso pa cubri gastonan di transporte local y otro gastonan chikito. Cuminda na hotel tambe tabata inclui den e gastonan cu Esso tabata cubri.
Mientras tanto nos cu a keda atras mester a cambia nos estilo di bida completamente. Como cu e hombernan mester a cushina pa nan mes, barbecue a bira e cuminda mas popular. Pa un rason cu nunca nos a compronde, gobierno no a declara ley seco y asina nos por a cumpra tur bebida cu nos tabata kier. E carnicerianan tabata bende beafsteak y lomito manera pan cayente. Tur atardi mi por a mira na diferente cas un cantidad di auto di amigonan cu a bin pa come barbecue y bebe cerbes.
Increibel, tabatin algun amigo masha religioso cu nunca a purba alcohol, pero a cuminsa bebe cerbes awo cu e famianan tabata afo. Un atardi cu algun amigo tabata na mi cas, a yega un colega di Texas conoci pa su devocion religioso. Pa mi sorpresa Jim tabatin un six-pack di Schlitz friu. Aparentemente Jim a dicidi cu mientras cu e crisis di e guera ta existi, e lo join su amigonan den nan perdicion. El a bira conoci como “Six-pack” Jim pasobra cu caminda cu e tabata bay e tabata hiba un six-pack di cerbes pa comparti cu su amigonan. Despues cu e famianan a bolbe Tripoli y bida a bira normal atrobe, mi amigo Jim nunca mas a dal un betro.
Despues cu mi famia tabatin dos siman na Napels mi a haya permiso pa bishita nan. Mi a keda sorprendi con bon e “refugiadonan” tabata pasando. E yiunan a insisti cu mi mester haci e tripnan cu nan a haci den Napels y den cercania. Asina mi a bin conoce Pompeii, cu volcan Vesuvius a dera cu shinishi na aña 79 AD. Nos a bishita isla Capri y tuma e bus te Anacapri, un municipio na e punto mas halto di e isla. Aya nos a bishita misa San Michele. Mi cabey ta lanta para ora mi pensa con e bus tabata tuma e loradanan skerpi riba e caminda cu tin biaha tabata asina cerca di precipicio di algun shen meter. Den un boto di rema nos a bishita Grotto Azzurra cu a impacta mi cu su splendor blauw. E anochi ey ami cu mi señora a bay mira e opera Gisela na e Teatro di San Marco. E siguiente dia mi a bolbe Tripoli, pero sabiendo cu mi no tabatin cu preocupa pa mi famia refugia na Napels.
Konimgin Wilhelmina Fonds a anuncia cu en conexion cu Dia di Tata 2017, e prijs di e buki “Un Arubiano Na Libia” a wordo rebaha cu 50%. Awor e ta benda pa apenas Afls 25.00, un regalo perfecto: Bon, barata y pa un causa nobel; no solamente pa Tatanan pero pa ruman, amigo y coleganan cu ta lesa Papiamento
Skirbi pa Clyde Harms