PORT-AU-PRINCE, Haiti – Jovenel Moise a wordo confirma diamars como presidente electo di Haiti cu un 55.60% di e votonan den e prome buelta di e comicionan, segun resultadonan oficial publica riba e website di Conseho Electoral Provisional Haitiano.
E resultado di e votacion aki, cu a tuma luga dia 20 di November ultimo, a pone un fin na un proceso electoral largo cu a cuminsa na October 2015 y cu a mantene paralisa e bida politico di e pais Caribense aki, AFP a afirma.
Moise lo inicia su carera, na 48 aña di edad, e proximo dia 7 di Februari, sucediendo Jocelerme Privert, e presidente provisional cu a keda eligi na Februari di 2016 pa Parlamento, tras salida sin sucesion di Michel Martelly.
E prome buelta di e eleccionnan presidencial a tuma luga na October 2015 dando tambe como vencedor na e empresario agricola aki. Sin embargo, e resultadonan a keda anula pa motibo di protesta y fraudenan masivo.
Reprograma pa dia 20 di November, e ultimo eleccion a tuma luga sin incidente mayor.
E resultadonan definitivo publica diamars ta otorga e 55.6% di e votonan na Moise, di e partido Haitiano Tet Kale (PHTK), sigui pa e candidato di e partido Lapeh, Jude Celestin (19.57%); despues Moise Jean Charles, di e partido Pitit Dessalines (11.04%) y pa Maryse Narcisse di e partido Fanmin Lavalas (9.01%).
Apesar di a gana e eleccion den e prome buelta, e presidente nobo no ta gosa di un amplio popularidad den e pais, unda cu e tasa di participacion apenas tabata di 21%.
Desde lunanan pasa, e instabilidad politico a paralisa e desaroyo economico di e Estado mas pober di Caribe, unda cu mas di 60% di e habitantenan ta sobrevivi cu menos di dos dollar pa dia, e deuda ta ascende na mas di 2000 miyon di dollar y e falta di inversionnan publico y priva, apenas por wordo premira un crecemento di 1% den 2017.
Casi shete aña despues di e terible teremoto cu a mata mas di 200 mil persona, na Januari di 2010, mas of menos 55 mil Haitiano ta sigui sobrevivi den campamento den condicionnan infrahumano, segun e Organisacion Internacional di Migracion (OIM).
E paso di horcan Matthew, October ultimo, a bolbe menasa e speransanan di un recuperacion economico.
Fuente: El Universal