TEGUCIGUALPA, Honduras – Autoridadnan policial Hondureño ta en busca di e pilotonan di un avioneta cu matricula Venezolano cu a ingresa den e pais riba e mainta di dialuna y a cay den un zona nort di e teritorio.
E investigadornan Hondureño ta kere cu den e avioneta nan tabata trafica droga, ya cu nan a cumpli cu e parametronan di e narcovuelonan, mirando yegada den e prome oranan di mainta, e aterishe den zonanan no autorisa y kimamento di e avion tras e descarga, segun DPA.
E avion tin bandera di Venezuela y a baha den un campo den e ciudad di Choloma, mas of menos un 280 kilometer di Tegucigualpa, e di tres ciudad mas pobla di Honduras.
Di acuerdo na informe di bisiñanan, cita pa prensa local, tras aterisa e avion, cinco vehiculo ATV a acerca na e sitio, a procede den retira e cargamento y despues a cende na candela. E dos tripulantenan di e avioneta tambe a huy di e luga.
Na Januari ultimo otro avion a cay den e departamento di Gracias a Dios, mas conoci como Mosquitia y autoridadnan a hay’e cendi.
Honduras, mescos cu e resto di e paisnan centro Americano, ta wordo uza como brug den e trafico di droga ta procede di e paisnan Sur Americano cu destino Merca.
Antes, vuelo di avionnan transportando droga tabata rutinario, pero tras un plan di e gobierno Hondureño cu a instala radarnan den e zona di Caribe, mescos cu e ayudo di e Comando Sur di e Forsanan Arma di Merca, a wordo reduci considerablemente e cantidad di dicho vuelonan, segun informe di e Gobierno norte Americano.
Fuente: El Universal